ឃោសនាបោះឆ្នោត ១សប្តាហ៍ បេក្ខជនបក្ស CNRP ស្លាប់ ២នាក់ ដោយសារគ្រោះថ្នាក់ចរាចរណ៍

2017-05-27 09:39:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យ៉ាងហោចណាស់ មានបេក្ខជនឈរឈ្មោះក្រុមប្រឹក្សាឃុំសង្កាត់របស់គណបក្សសង្គ្រោះជាតិ ២នាក់ បានស្លាប់ ដោយសារតែគ្រោះថ្នាក់ចរាចរណ៍ ក្នុងរយៈពេលនៃយុទ្ធនាការឃោសនាបោះឆ្នោតឃុំសង្កាត់ ១សប្តាហ៍មកនេះ។ ក្នុងនោះ មានបេក្ខជនម្នាក់ នៅខេត្តពោធិ៍សាត់ និងបេក្ខជនម្នាក់ទៀត នៅខេត្តព្រះសីហនុ។

សេចក្តីរាយការណ៍បង្ហាញថា លោក សែម ចិន្តា ជាអនុប្រធានក្រុមការងារជួយភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ដែលជាបេក្ខជនឈរឈ្មោះ ជាចៅសង្កាត់របស់គណបក្សសង្គ្រោះជាតិ នៅសង្កាត់លេខ១ ក្នុងក្រុងព្រះសីហនុ បានស្លាប់ កាលពីម៉ោង ១ រំលងអាធ្រាត្រ យប់ថ្ងៃទី២៦ឧសភា ឈានចូលថ្ងៃទី២៧ ខែឧសភា ឆ្នាំ២០១៧ ដោយសារគ្រោះថ្នាក់ចរាចរណ៍ នៅមុខអគារ ៧ជាន់ ជិតរោងចក្រ ញូវស្តារ ក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ។

ចំណែកស្ត្រីបេក្ខជនឃុំសង្កាត់របស់គណបក្សសង្គ្រោះជាតិ ម្នាក់ទៀត ក៏បានស្លាប់ និងបុរសម្នាក់រងរបួស ដោយសារគ្រោះថ្នាក់ចរាចរណ៍ ក្នុងពេលឃោសនាបោះឆ្នោត កាលពីព្រឹកថ្ងៃទី២៤ ខែឧសភា ឆ្នាំ២០១៧ នៅខេត្តពោធិ៍សាត់។

ដោយឡែក នៅឯខេត្តបាត់ដំបង ក្នុងអំឡុងពេលឃោសនាបោះឆ្នោតឃុំសង្កាត់ កាលពីព្រឹកថ្ងៃទី២៤ ខែឧសភា ឆ្នាំ២០១៧ ក្បួនឃោសនាគណបក្សប្រជាជនកម្ពុជា ក៏បានបង្កគ្រោះថ្នាក់ បណ្តាលឲ្យប្រជាពលរដ្ឋម្នាក់ស្លាប់ផងដែរ។ ហេតុការណ៍នោះ បានកើតឡើងនៅឃុំ ស្រុកមោងឫស្សី ខេត្តបាត់ដំបង។ គណបក្សប្រជាជនកម្ពុជា នៅមូលដ្ឋាននោះ បានប្រកាសទទួលខុសត្រូវ ដោះស្រាយលើបញ្ហាគ្រោះថ្នាក់ចរាចរណ៍ បណ្តាលឲ្យស្លាប់មនុស្សនេះ៕

អត្ថបទ៖ លាភ.