ក្រុមហ៊ុន ម៉ុង ឫទ្ធី រំពឹងថា នឹងនាំចេញប្រេងដូង ២០លានដុល្លារ ឆ្នាំ២០១៧នេះ
- 2017-05-29 02:20:24
- ចំនួនមតិ 0 | ចំនួនចែករំលែក 0
ក្រុមហ៊ុន ម៉ុង ឫទ្ធី រំពឹងថា នឹងនាំចេញប្រេងដូង ២០លានដុល្លារ ឆ្នាំ២០១៧នេះ
ចន្លោះមិនឃើញ
ប្រទេសកម្ពុជាបាននាំចេញប្រេងដូងមានតម្លៃជាង ១៣លានដុល្លារ កាលពីឆ្នាំ២០១៦ ខណៈក្រុមហ៊ុនរំពឹងថា ការនាំចេញឆ្នាំ២០១៧នេះ នឹងកើនឡើងប្រមាណ ២០លានដុល្លារ។ នេះបើតាមតួលេខពីក្រុមហ៊ុន ម៉ុង ឫទ្ធី គ្រុប ដែលជាក្រុមហ៊ុននាំចេញប្រេងដូងតែមួយគត់នៅក្នុងប្រទេសកម្ពុជាគិតមកដល់ពេលនេះ។
ក្រុមហ៊ុនផលិតប្រេងដូងកម្ពុជា Mong Reththy Investment Cambodia Oil Palm ក៏បានព្យាករថា បរិមាណនៃការនាំចេញនឹងកើនដល់ ៣ម៉ឺនតោននៅឆ្នាំនេះ។ នេះបើយោងតាមលោក ប្រាចាក់ គង់តានំថាំ អនុប្រធានទទួលបន្ទុកផ្នែកលក់ និងទីផ្សារនៅក្រុមហ៊ុន Mong Reththy Investment Cambodia Oil Palm Co.,Ltd។
ទិន្នន័យពីក្រុមហ៊ុនបានឲ្យដឹងថា កាលពីឆ្នាំ២០១៦ ក្រុមហ៊ុនបាននាំចេញប្រេងដូងមិនទាន់កែច្នៃ ២១.៤៥០តោន កើនឡើង ៦ភាគរយ ធៀបនឹងរយៈពេលដូចគ្នាកាលពីឆ្នាំ២០១៥។
លោកបានប្រាប់ឲ្យដឹងទៀតថា មកដល់ពេលនេះ ដូងប្រេងលើផ្ទៃដីប្រហែល ១៧ ០០០ហិកតា អាចប្រមូលផលបានហើយ “យើងបាននាំចេញទៅទិសដៅទីផ្សារសំខាន់ៗនៅអឺរ៉ុប កូរ៉េ ចិន ប៉ាគីស្ថាន ឥណ្ឌា និងម៉ាឡេស៊ី”។
បច្ចុប្បន្ននៅកម្ពុជា ក៏មានក្រុមហ៊ុនដាំដូងប្រេងពីរផ្សេងទៀត ដែលកំពុងប្រតិបត្តិការចម្ការដូងប្រេងក្នុងខេត្តកំពត និងខេត្តរតនគិរី។ ក្រុមហ៊ុនមួយក្នុងចំណោមក្រុមហ៊ុននេះ គឺក្រុមហ៊ុន Virtus Green Plantations (Cambodia) បានប្រមូលផលរួចហើយលើកសិដ្ឋានរបស់ខ្លួន និងលក់ឲ្យក្រុមហ៊ុនម៉ុង ឫទ្ធី។
លោក សយ សូណា ប្រធានមន្ទីរកសិកម្មខេត្តរតនគិរី បានឲ្យដឹងថា ចម្ការប្រេងដូងដ៏ធំផ្សេទៀតនៅខេត្តរតនគិរី ដែលបានដាំដុះលើផ្ទៃដី ១៨ ០០០ហិកតា ជាការវិនិយោគរបស់ក្រុមហ៊ុនវៀតណាម Hoang Anh Gia Lai (HAGL) រំពឹងថា នឹងប្រមូលផលពេញលេញនៅឆ្នាំក្រោយ៕