ខេត្តប៉ៃលិន និងក្រុងប៉ោយប៉ែត ត្រូវជន់លិច ដោយសារភ្លៀងធ្លាក់ ១០ថ្ងៃជាប់គ្នា

2017-05-29 03:28:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភ្លៀងធ្លាក់ទាំងថ្ងៃទាំងយប់ រយៈពេល១០ថ្ងៃ បានបង្កជាទឹកជំនន់ ជន់លិចផ្ទះប្រជាពលរដ្ឋជាង ៥០ខ្នង នៅក្នុងស្រុកសាលាក្រៅ ខេត្តប៉ៃលិន និងក្រុងប៉ោយប៉ែត ខេត្តបន្ទាយមានជ័យ។ យ៉ាងណាក្ដី ទឹកជំនន់នេះ មិនបានបង្កឲ្យប៉ះពាល់ដល់អាយុជីវិត មនុស្ស ឬសត្វនោះឡើយ។

ប្រជាពលរដ្ឋនៅភូមិស្ទឹងត្រង់ ឃុំស្ទឹងត្រង់ ស្រុកសាលាក្រៅ បានរងផលប៉ះពាល់ខ្លាំងជាងគេ ដោយសារតែទឹកបានហៀរចេញអូរ ស្ទឹង និងហូរធ្លាក់មកពីលើភ្នំកាន់តែច្រើន ខណៈភ្លៀងនៅតែបន្តធ្លាក់រាល់ថ្ងៃ។

លោកញ៉ឹក ថុល អធិការនគរបាលស្រុកសាលាក្រៅ បានឲ្យដឹងថា លោកមិនទាន់ដឹងច្បាស់ថាលិចលង់ប៉ុន្មានខ្នងនៅឡើយទេ ដោយលោកកំពុងចាត់កម្លាំងចុះត្រួតពិនិត្យ និងដោះស្រាយជូនពលរដ្ឋ ជាមួយអាជ្ញាធរខេត្តប៉ៃលិន។

រីឯនៅក្រុងប៉ោយប៉ែត ខេត្តបន្ទាយមានជ័យវិញ ក៏កំពុងស្ថិតក្នុងស្ថានភាពធ្ងន់ធ្ងរដែរ។ ផ្លូវជាច្រើនខ្សែនៅទីប្រជុំជនប៉ោយប៉ែត រួមទាំងវត្តអារាម សាលារៀន ចំណតរថយន្ត និងផ្ទះប្រជាពលរដ្ឋ កំពុងរងការលិចលង់។

អ្នកនាំពាក្យក្រសួងធនធានទឹក និងឧតុនិយម លោកចាន់ យុត្ថា បានបញ្ជាក់ថា ខេត្តប៉ៃលិន ភ្លៀងបានធ្លាក់ក្នុងបរិមាណ ៤៥មីល្លីម៉ែត្រ រយៈពេលប៉ុន្មានថ្ងៃជាប់គ្នា បណ្ដាលឲ្យមានជំនន់ទឹកភ្លៀង លិចផ្ទះប្រជាពលរដ្ឋ ៣៦ខ្នង និងហូរកាត់លើកំណាត់ផ្លូវលំ ១ខ្សែ ប្រវែង ១០០ម៉ែត្រ នៅឃុំស្ទឹងត្រង់ សុ្រកសាលាក្រៅ ខេត្តប៉ៃលិន៕

ប្រភព៖ រស្មីកម្ពុជា ប្រែសម្រួល៖ សុខ សុវត្ថិ