អង្គការ ILO៖ ការងារធ្លាក់ចុះ ទោះបីជាការនាំចេញកើនឡើង នៅក្នុងវិស័យកាត់ដេរនៅកម្ពុជា
- 2017-05-29 12:37:10
- ចំនួនមតិ 0 | ចំនួនចែករំលែក 0
អង្គការ ILO៖ ការងារធ្លាក់ចុះ ទោះបីជាការនាំចេញកើនឡើង នៅក្នុងវិស័យកាត់ដេរនៅកម្ពុជា
ចន្លោះមិនឃើញ
អង្គការអន្តរជាតិខាងការងារ ហៅកាត់ថា ILO បានប្រកាសថា ការងារនៅក្នុងវិស័យកាត់ដេរ និងស្បែកជើងកម្ពុជា មានការធ្លាក់ចុះ បើទោះបីជាការនាំចេញ ទទួលបានលទ្ធផលល្អក្តី។
សេចក្តីប្រកាសរបស់អង្គការ ILO នាថ្ងៃទី២៩ឧសភានេះ ឱ្យដឹងថា ក្នុងពេលដែលការនាំចេញបន្តកើនឡើង ក្នុងល្បឿនដ៏រឹងមាំមួយ ក្នុងឆ្នាំ២០១៦ ដោយមានការកើនឡើងដល់ ៧,៣ ពាន់លានដុល្លារ តែចំនួននៃរោងចក្រនាំចេញ ដែលបានចុះបញ្ជីជាផ្លូវការ ក្នុងវិស័យនេះ បានធ្លាក់ចុះចំនួន ១០,៤%។ លើសពីនេះ ចំនួនកម្មករ បានធ្លាក់ចុះចំនួន ២,៩% ក្នុងឆ្នាំ២០១៦ បើប្រៀបធៀបនឹងឆ្នាំ២០១៥។
អង្គការនេះ បានលើកយកកត្តាចម្បងបី ដែលបង្ហាញពីភាពមិនស្របគ្នារវាងការនាំចេញ និងការធ្លាក់ចុះចំនួនការងារ និងការបង្កើតសហគ្រាសថ្មី។ ទី១-ការកើនឡើងនូវផលិតភាពរបស់ឧស្សាហកម្មនេះ ទី២-បញ្ហាផ្នែកស្ថិតិទាក់ទងនឹងការវាស់វែងចំនួនការងារ និងចំនួនរោងចក្រ ទី៣-កំណើនផលិតកម្មនៅក្នុងរោងចក្រម៉ៅការបន្ត។
លោក Maurizio Bussi នាយកការិយាល័យអង្គការ ILO ប្រចាំប្រទេសថៃ កម្ពុជា និងឡាវ មានប្រសាសន៍ថា កំណើនការងារ និងផលិតកម្មនៅក្នុងរោងចក្រម៉ៅការបន្ត អាចជាការព្រួយបារម្ភមួយ ប្រសិនបើការម៉ៅការបន្តកំពុងត្រូវបានគេប្រើប្រាស់ជាវិធីមួយ ក្នុងការជៀសវាងច្បាប់ និងក្របខ័ណ្ឌគតិយុត្តិ រួមទាំងច្បាប់ការងារ និងប្រាក់ឈ្នួលអប្បបរមានោះ។
អង្គការ ILO ក៏បានប្រកាសថា ចំណូលប្រចាំខែជាធម្យម ( រួមទាំងប្រាក់ម៉ោងបន្ថែម ) របស់កម្មករកាត់ដេរ និងស្បែកជើងកម្ពុជា បានកើនឡើងពី ១៤៥ ដុល្លារ ក្នុងឆ្នាំ២០១៤ ដល់ ១៧៥ ដុល្លារ ក្នុងឆ្នាំ២០១៥ និងកើនដល់ ១៩៥ដុល្លារ ក្នុងឆ្នាំ២០១៦៕