លោក សុខ ទូច ថាមន្ត្រីឃុំ-សង្កាត់មានចំណេះដឹងទាបមិនអាចអភិវឌ្ឍមូលដ្ឋានបានទេ
- 2017-05-29 14:10:25
- ចំនួនមតិ 0 | ចំនួនចែករំលែក 0
លោក សុខ ទូច ថាមន្ត្រីឃុំ-សង្កាត់មានចំណេះដឹងទាបមិនអាចអភិវឌ្ឍមូលដ្ឋានបានទេ
ចន្លោះមិនឃើញ
អនុប្រធានរាជបណ្ឌិត្យសភាកម្ពុជា យល់ថា មន្ត្រីនៅតាមឃុំ-សង្កាត់មានចំណេះដឹងទាប ដែលមិនអាចអភិវឌ្ឍនៅតាមជនបទដោយខ្លួនឯងបានទេ ហើយចាំបាច់ត្រូវតែមានក្រសួងអភិវឌ្ឍន៍ជនបទ ទើបអាចធ្វើផ្លូវ ធ្វើប្រឡាយមេ ឬអភិវឌ្ឍពីឃុំមួយទៅឃុំមួយទៀតបាន។ ការលើកឡើងនេះ ជាការឆ្លើយតបទៅនឹងគណបក្សប្រឆាំងដែលមានគម្រោងចង់កាត់ក្រសួងអភិវឌ្ឍន៍ជនបទ ចោលនៅពេលគណបក្សនេះឈ្នះឆ្នោតដឹកនាំរដ្ឋាភិបាល។
អនុប្រធាននៃរាជបណ្ឌិត្យសភាកម្ពុជា លោក សុខ ទូច លើកឡើងថា គោលនយោបាយទម្លាក់ថវិកា ៥០ម៉ឺនដុល្លារអាមេរិករបស់គណបក្សសង្គ្រោះជាតិ ទៅតាមឃុំ-សង្កាត់នីមួយៗ គ្រាន់តែជាទ្រឹស្ដីតែប៉ុណ្ណោះ។ លោក សុខ ទូច ដែលមានងារជាបណ្ឌិតសភាចារ្យ យល់ថា មន្ត្រីថ្នាក់ឃុំ-សង្កាត់មិនមានចំណេះដឹងស្មើមន្ត្រីនៅក្រសួងអភិវឌ្ឍន៍ជនបទ ទេ ហើយបើទោះជាលុបក្រសួងអភិវឌ្ឍន៍ជនបទ មួយចោល ក៏មិនទាន់ឆ្លើយតបនឹងតម្រូវការថវិកាគ្រប់គ្រាន់សម្រាប់ទម្លាក់ឲ្យឃុំ-សង្កាត់ដូចគណបក្សសង្គ្រោះជាតិ សន្យានោះដែរ។ បើតាមគោលនយោបាយគណបក្សប្រឆាំងនេះ ក្រុមបណ្ឌិតនៅរាជបណ្ឌិត្យសភាកម្ពុជា បារម្ភពីការកាត់ប្រាក់ខែរបស់មន្ត្រីរាជការដើម្បីយកទៅដំឡើងថវិកានៅឃុំ-សង្កាត់ឲ្យបាន ៥០ម៉ឺនដុល្លារក្នុងមួយឃុំ-សង្កាត់។
លោក កឹម សុខា ប្រធានគណបក្សសង្គ្រោះជាតិ បានប្រកាសប្រាប់ពលរដ្ឋនៅអំឡុងហែឃោសនាបក្សតាមឃុំ-សង្កាត់ថា គណបក្សប្រឆាំងមានគម្រោងលុបក្រសួងអភិវឌ្ឍន៍ជនបទ ដើម្បីបង្វែរថវិកាទាំងនោះយកទៅឲ្យមន្ត្រីតាមឃុំ-សង្កាត់ អភិវឌ្ឍឃុំ-សង្កាត់ដោយខ្លួនឯង ដោយមិនចាំបាច់មានមន្ត្រីនៅថ្នាក់ជាតិដើម្បីទៅអភិវឌ្ឍនៅតាមមូលដ្ឋាននោះទេ។
ក្រុមបណ្ឌិតដែលមានទាំងបណ្ឌិតប្រវត្តិសាស្ត្រ បណ្ឌិតសេដ្ឋកិច្ច បណ្ឌិតវិទ្យាសាស្ត្រនយោបាយ ជាដើម បានជួបជជែកជាមួយតំណាងគណបក្សនយោបាយចំនួន៤ នៅព្រឹកថ្ងៃទី២៩ ឧសភា នៅក្នុងកម្មវិធីកិច្ចពិភាក្សាតុមូលស្ដីពីគោលនយោបាយរបស់គណបក្ស សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧ នៅរាជបណ្ឌិត្យសភាកម្ពុជា។ តំណាងគណបក្សនយោបាយទាំង៤ ដែលចូលរួមមានតំណាងគណបក្សប្រជាជនកម្ពុជា គណបក្សសង្គ្រោះជាតិ គណបក្សហ៊្វុនស៊ិនប៉ិច និងគណបក្សប្រជាធិបតេយ្យមូលដ្ឋាន។
តំណាងគណបក្សសង្គ្រោះជាតិ លោក សុន ឆ័យ ដែលមិនសូវជាមានឱកាសបានឆ្លើយតបនឹងការលើកឡើងរបស់លោក សុខ ទូច ប្រាប់អ្នកសារព័ត៌មានក្រោយកម្មវិធីថា លោកបណ្ឌិត សុខ ទូច មិនគួរមើលងាយមន្ត្រីនៅតាមឃុំ-សង្កាត់នោះទេ។ ចំពោះថវិកាដែលគណបក្សសង្គ្រោះជាតិ សន្យា ៥០ម៉ឺនដុល្លារឲ្យឃុំនីមួយៗ លោក សុន ឆ័យ ថាមិនមែនយកតែពីការលុបចោលក្រសួងអភិវឌ្ឍន៍ជនបទ ទាំងស្រុងនោះទេ គឺកាត់ចេញពីគ្រប់ស្ថាប័នថ្នាក់ជាតិដែលកន្លងមកលោកថា បានចាយវាយខុសគោលដៅច្រើនណាស់ ហើយថវិកាទាំងនោះក៏មិនយកពីការកាត់បៀវត្សរ៍របស់មន្ត្រីរាជការដែរ។ លោក សុន ឆ័យ អះអាងថា គណបក្សសង្គ្រោះជាតិ នឹងបញ្ចេញគោលនយោបាយប្រាក់ខែមន្ត្រីរាជការនៅមុនការបោះឆ្នោតថ្នាក់ជាតិឆ្នាំ២០១៨៖ «យើងមិនត្រូវមាក់ងាយសមត្ថភាពអ្នកមូលដ្ឋានទេបាទ! ព្រោះអ្នកមូលដ្ឋានគេដឹងអ្វីដែលគេចង់បានជាង ព្រោះកន្លងមកយើងច្រើនតែដាក់ថ្នាំខុស។ យើងអត់ដឹងអ្នកមូលដ្ឋានគេចង់បានអីផង! យើងយកមកបែងចែកថ្នាក់លើហ្នឹង»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏មិនយល់ស្របនឹងគំនិតលោក សុខ ទូច ដែរ។ លោក សុខ ឥសាន យល់ថា ការអភិវឌ្ឍភូមិឃុំ និងការធ្វើនយោបាយ មិនចាំបាច់ទាល់តែអ្នកមានសញ្ញាបត្រធំៗទេ៖ «បើនយោបាយផ្អែកទៅលើសញ្ញាបត្រអត់ទៅរួចទេ។ វាត្រូវតែផ្អែកទៅលើឧត្តមគតិស្នេហាជាតិ ស្រឡាញ់ប្រទេសពិតៗ។ ប៉ុល ពត មិនមែនជាកូនអ្នកស្រែអវិជ្ជាទេ។ ប៉ុល ពត រៀនស្រុកបារាំង។ ខៀវ សំផន សញ្ញាបត្រ ៧-៨។ មូលហេតុអ្វីបង្កើតប្រល័យពូជសាសន៍សម្លាប់ប្រជាជាតិឯង។ អានេះហើយវាបញ្ជាក់ថា អត់មានសញ្ញាបត្រយកជាមូលដ្ឋាន ឧត្តមគតិជាមូលដ្ឋាន»៕