គ្រូបង្វឹកក្រុមគោព្រៃ៖ គ្មានអ្វីអាចទិញក្រុមនេះបានឡើយ

2017-06-14 04:21:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Leonardo Vitorino គ្រូបង្វឹកក្រុមគោព្រៃកម្ពុជា បានបង្ហាញនិងផ្ដល់ទំនុកចិត្តសម្រាប់អ្នកគាំទ្រកម្ពុជា នៅក្នុងសន្និសីទសារព័ត៌មាន បន្ទាប់ពីកូនក្រុមរបស់លោក ទទួលបានជ័យជម្នះលើក្រុមអាហ្វហ្គានីស្ថាន ដោយលទ្ធផល ១-០ ក្នុងការប្រកួតវគ្គជម្រុះ AFC Asian Cup ពូល C កាលពីម្សិលមិញ។

«គ្មានអ្វីអាចទិញក្រុមនេះ (ជម្រើសជាតិកម្ពុជា) បានឡើយ។ ពួកយើងលេងដើម្បីឈ្នះ»។ នេះជាសម្ដីរបស់លោក Leo ។

គ្រូបង្វឹកដែលមានវ័យ ៤៤ឆ្នាំរូបនេះបានឲ្យដឹងដែរថា ជ័យជម្នះយប់មិញ គឺជាការខិតខំប្រឹងប្រែងរបស់កីឡាករគ្រប់រូប និងជាលទ្ធផលដ៏ល្អមួយ។ លោកបន្តថា បើសិនជាយប់មិញកម្ពុជា ទទួលរងបរាជ័យក្នុងការប្រកួតនេះក្ដី ក៏រូបលោកមិនផ្លាស់ប្ដូរគោលជំហររបស់ខ្លួនដដែល គឺលោកនឹងបន្តអភិវឌ្ឍវិស័យបាល់ទាត់កម្ពុជា ដើម្បីត្រៀមសម្រាប់កីឡាស៊ីហ្គេម ឆ្នាំ២០២៣។

គួរបញ្ជាក់ថា កម្ពុជា បានផ្លោះឡើងទៅចំណាត់ថ្នាក់ទី២ បណ្ដោះអាសន្ន ក្នុងពូល C ដោយមានចំនួន ៣ពិន្ទុ ក្នុង ២ប្រកួត។ ចំណែក អាហ្វហ្គានីស្ថានបានធ្លាក់ទៅលេខ៤ មាន ១ពិន្ទុ។ ហ្សកដានី នៅតែបន្តឈរលេខ១ មាន ៤ពិន្ទុ បន្ទាប់ពីប្រកួតទីពីរយប់មិញ ស្មើជាមួយក្រុមម្ចាស់ផ្ទះ វៀតណាម ០-០៕

អត្ថបទ៖ លាភ.