ម្រេច នឹងកាន់តែមានទីផ្សារ នៅពេលកម្ពុជា ចូលជាសមាជិកសហគមន៍ម្រេចអន្តរជាតិ

2017-06-15 08:42:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្ត្រីពាណិជ្ជកម្ម លោក ប៉ាន សូរស័ក្តិ បាននិយាយថា កម្ពុជា នឹងអាចចូលជាសមាជិកសង្កេតការណ៍របស់សហគមន៍ម្រេចអន្តរជាតិ មុននឹងក្លាយជាសមាជិកពេញសិទ្ធិ។ ការចូលជាសមាជិករបស់សហគមន៍នេះ នឹងទទួលបានអត្ថប្រយោជន៍លើការលើកកំពស់ផលិតភាព បច្ចេកទេសថ្មីៗ ការស្រាវជ្រាវនានាការគាំទ្រលើខ្សែសង្វាក់ផលិតផលទាំងមូល ក៏ដូចជាសម្របសម្រួលរវាងកសិករ និងឈ្មួញ ដើម្បីឈានទៅដល់ការនាំចេញទៅទីផ្សារបរទេស។

ការលើកឡើងនេះ ក្នុងជំនួបរវាងលោក ប៉ាន សូរស័ក្តិ និងលោកស្រី Hoang Thi Lien នាយកប្រតិបត្តិនៃសហគមន៍ម្រេចអន្តរជាតិ ដែលជាស្ថាប័នមួយក្រោមក្របខណ្ឌគណៈកម្មការសេដ្ឋកិច្ច និងសង្គមប្រចាំតំបន់អាស៊ីប៉ាស៊ីហ្វិក របស់ UN (UNESCAP) កាលពីថ្ងៃទី១៤មិថុនា។

បច្ចុប្បន្នសមាជិកពេញសិទ្ធិនៃសហគមន៍នេះ មានចំនួន ៦ ប្រទេស រួមមាន វៀតណាម ឥណ្ឌូណេស៊ី ប្រេស៊ីល ឥណ្ឌា ស្រីលង្ការ និងម៉ាឡេស៊ី។

លោក ប៉ាន សូរស័ក្តិ អះអាងថា ម្រេចកម្ពុជា ជាកសិផលមួយដែលមានភាពល្បីល្បាញ ជាពិសេសម្រេចកំពត ដែលជាទំនិញបញ្ជាក់ភូមិសាស្ត្រ (Geographical Indication) និងមានតម្លៃខ្ពស់នៅលើទីផ្សារពិភពលោក។

លោកបានណែនាំឲ្យសហគមន៍ម្រេចអន្តរជាតិ សហការជាមួយក្រសួងពាណិជ្ជកម្ម រៀបចំសិក្ខាសាលាមួយនៅកម្ពុជា ដើម្បីបង្កើតជាវេទិកាប្រឹក្សាជាមួយកសិករ អ្នកប្រមូលទិញ និងអ្នកនាំចេញម្រេច ក្នុងគោលបំណងលើកស្ទួយការអភិវឌ្ឍន៍ផលិតផលម្រេចនៅកម្ពុជាបន្ថែមទៀត៕

អត្ថបទ៖ សំភី