ព្រឹកនេះ ប្រធានបក្សយុវជនកម្ពុជា ទៅតុលាការ ដាក់ពាក្យបណ្ដឹងប្ដឹងលោកកឹម សុខា

2017-06-20 02:20:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី២០ ខែមិថុនានេះ លោក ពេជ្រ ស្រស់ ប្រធានគណបក្សយុវជនកម្ពុជា បានដាក់ពាក្យបណ្តឹងប្តឹងលោក កឹម សុខា ប្រធានគណបក្សសង្រ្គោះជាតិ នៅសាលាដំបូងរាជធានីភ្នំពេញ។ ការប្តឹងនេះ គឺដោយសារតែលោកកឹម សុខា បានប្រើប្រាស់សារនយោបាយ នាំឱ្យមានការរើសអើងគណបក្សនយោបាយ។

លោកពេជ្រ ស្រស់ បានថ្លែងប្រាប់ក្រុមអ្នកកាសែតនៅមុខតុលាការថា គោលបំណងនៃការប្តឹង គឺចង់ទាមទារស្វែងរកសេចក្តីថ្លៃថ្នូរជូនគណបក្សតូចៗ និងគណបក្សយុវជនកម្ពជា ព្រមទាំងឱ្យលោកកឹម សុខា ទទួលខុសត្រូវចំពោះមុខច្បាប់។

លោក ពេជ្រ ស្រស់ នៅមុខសាលាដំបូងរាជធានីភ្នំពេញព្រឹកនេះ

លោកពេជ្រ ស្រស់ បានបញ្ជាក់ថា លោកកឹម សុខា បានចាត់ទុកសន្លឹកឆ្នោតរបស់បក្សផ្សេងក្រៅពីបក្សខ្លួន ថាជាការបង្ហិនសន្លឹកឆ្នោត។ លោកថា ការលើកឡើងរបស់លោកកឹម សុខា បានឆ្លុះបញ្ចាំងពីការរំលោភសិទ្ឋិរបស់ពលរដ្ឋខ្មែរ ក្នុងការជ្រើសរើសមេដឹកនាំ ដែលខ្លួនស្រលាញ់។ ការលើកឡើងនេះ ក៏ជាការបញ្ឆេះឲ្យមានការរើសអើងគណបក្សនយោបាយផងដែរ ដោយលោក កឹម សុខា បាននិយាយថាស្រុកខ្មែរ គឺមានបក្សតែពីរ ដែលអាចបម្រើពលរដ្ឋបាន ជាពិសេសមានតែគណបក្សសង្រ្គោះជាតិតែម្តង ស្របពេលមានគណបក្ស ១០ទៀត ដែលគេមានសិទ្ធិ ធ្វើនយោបាយ ដូចបក្សសង្រ្គោះជាតិដែរ។

លោកពេជ្រ ស្រស់ បានអះអាងថា ការលើកឡើងរបស់លោកកឹម សុខា គឺបានរំលោភច្បាប់រដ្ឋធ្មនុញ្ញ និងច្បាប់ស្តីពីគណបក្សនយោបាយ ដែលធានាឱ្យមានភាពស្មើគ្នារបស់គណបក្សនយោបាយនីមួយៗ៕

អត្ថបទ៖ សុខ សុវត្ថិ