ប្រធានមន្ទីរធម្មការខេត្តចុះផ្សព្វផ្សាយមិនឲ្យព្រះសង្ឃធ្វើសកម្មភាពបម្រើបក្សនយោបាយ

2017-06-20 03:00:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានមន្ទីរធម្មការ និងសាសនាខេត្តបន្ទាយមានជ័យ លោក យឹម យឿន និង អភិបាលរងក្រុងសិរីសោភ័ណ លោក ម៉ៅ វណ្ណា បានធ្វើការអំពាវនាវ និងអប់រំផ្សព្វផ្សាយប្រគេនដល់ព្រះសង្ឃជាង ១០០អង្គ គង់នៅក្នុងវត្តព្រះពន្លា ស្ថិតក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ កុំឲ្យចូលរួមធ្វើសកម្មភាពអ្វីដែលខុសនឹងវិន័យសង្ឃ ប៉ះពាល់សង្គម និងវិស័យព្រះពុទ្ធសាសនា ជាពិសេស កុំឲ្យទៅចូលរួមធ្វើសកម្មភាពបម្រើបក្សនយោបាយ ឬអង្គការសង្គមស៊ីវិលណាមួយខុសច្បាប់ ដោយទៅធ្វើបាតុកម្មប្រឆាំងរដ្ឋាភិបាល ឬចូលរួមក្នុងសកម្មភាពញុះញង់ ដែលបង្កឲ្យប៉ះពាល់សង្គម និងវិស័យព្រះពុទ្ធសាសនាយ៉ាងធ្ងន់ធ្ងរនោះ។

លោកលើកឡើងទៀតថា សកម្មភាពទៅចូលរួមបម្រើគណបក្សនយោបាយរបស់ព្រះសង្ឃបែបនោះ គឺជាការអនុវត្តខុសនឹងវិន័យសង្ឃ ហើយវានាំបង្កឲ្យមានការបែកបាក់ដល់ពុទ្ធបរិស័ទចំណុះជើងវត្ត និងប្រជាជន ធ្វើឲ្យប្រជាជនខ្វះជំនឿ និងថែមទាំងប៉ះពាល់ដល់វិស័យព្រះពុទ្ធសាសនាជាខ្លាំងតែម្តង។

ការលើកឡើងខាងលើពីសំណាក់ប្រធានមន្ទីរធម្មការ និងសាសនាខេត្តបន្ទាយមានជ័យ និងអាជ្ញាធរក្រុងសិរីសោភ័ណ ធ្វើឡើងកាលពីរសៀលថ្ងៃទី១៩ មិថុនា ២០១៧ ក្នុងឱកាសពិធីសំណេះសំណាលពង្រឹងការអនុវត្តវិន័យរបស់ព្រះសង្ឃ និងគណៈកម្មការវត្តនៅក្នុងវត្តព្រះពន្លា។

លោកប្រធានមន្ទីរធម្មការ និងសាសនាខេត្តបន្ទាយមានជ័យ បានលើកឡើងទៀតថា ព្រះសង្ឃ គឺជាតួអង្គសំខាន់សម្រាប់ប្រជាពលរដ្ឋទូទៅគោរពប្រតិបត្តិ និងមានការប្រៀនប្រដៅប្រជាពលរដ្ឋឱ្យធ្វើអ្វីជាអំពើល្អ។ បញ្ហានយោបាយព្រះសង្ឃត្រូវតែនៅជាអព្យាក្រឹត ជាការល្អប្រសើរបំផុត ។ ព្រះសង្ឃមានសិទ្ធិបោះឆ្នោត និងចូលជាសមាជិកបក្សនយោបាយដែលខ្លួនស្រលាញ់ ប៉ុន្តែមិនឲ្យទៅចូលរួមធ្វើសកម្មភាពនោះឡើយ៕

ប្រភព៖ អគ្គស្នងការដ្ឋាននគរបាលជាតិ ប្រែសម្រួល៖ វាសនា