កម្ពុជា ស្នើឲ្យ FBI អាមេរិក ជួយបណ្ដុះបណ្ដាលមន្ត្រីនគរបាលរបស់ខ្លួន

2017-06-20 03:48:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្នើឲ្យស្ថាប័ន FBI របស់សហរដ្ឋអាមេរិក ជួយបណ្ដុះបណ្ដាលមន្ត្រីនគរបាលកម្ពុជា ឲ្យបានចំនួន២រូបក្នុង១ឆ្នាំ។ ការស្នើនេះ ធ្វើឡើងក្នុងសន្និសីទអតីតសិក្ខាកាមបណ្ឌិតសភា FBI ប្រចាំអាស៊ីប៉ាស៊ីហ្វិកលើកទី២០ ដែលប្រារព្ធនៅខេត្តសៀមរាប កាលពីថ្ងៃទី១៩ ខែមិថុនា ឆ្នាំ២០១៧។ ឆ្លើយតបនឹងសំណើខាងលើ លោក Paul Delacourt តំណាងស្ថាប័ន FBI បាននិយាយថា សម្រាប់សំណើរបស់កម្ពុជា លោកនឹងរាយការណ៍ទៅរដ្ឋាភិបាលសហរដ្ឋអាមេរិក ដើម្បីពិនិត្យ និងសម្រេច។

សម្ដេច ស ខេង បានថ្លែងថា បច្ចុប្បន្ន អំពើភេរវកម្មអន្តរជាតិ កំពុងកើតឡើងជាបន្តបន្ទាប់ ក្រោមរូបភាពផ្សេងៗគ្នា ដូចជា ការបើករថយន្តបុកហ្វូងមនុស្ស ការបំផ្ទុះគ្រាប់បែកអត្តឃាត និងការបាញ់រះ ជាដើម។ ហេតុដូច្នេះហើយ កម្ពុជា ត្រូវត្រៀមសមត្ថភាពឲ្យបានគ្រប់គ្រាន់ ជាពិសេសមានទំនាក់ទំនង និងកិច្ចសហប្រតិបត្តិការជិតស្និទ្ធជាមួយនឹងបណ្ដាប្រទេសនៅក្នុងពិភពលោក ដើម្បីរួមគ្នាទប់ស្កាត់ និងបង្ក្រាបបទល្មើសឲ្យបានទាន់ពេលវេលា។

បន្ថែមពីនេះ សម្ដេចក្រឡាហោម បានបញ្ជាក់ថា សព្វថ្ងៃ កម្ពុជា មានមន្ត្រីជាអតីតសិក្ខាកាមបណ្ឌិតសភា FBI ចំនួន៨នាក់ និងត្រៀមចូលទៅបណ្ដុះបណ្ដាលម្នាក់ទៀត ក្នុងខែកក្កដាខាងមុខ៕

អត្ថបទ៖ ឈាង.