អ្នកវិនិយោគថៃ ងាកទៅដាក់ទុនវិនិយោគនៅក្រៅប្រទេសយ៉ាងគំហុក

2017-06-20 06:03:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកវិនិយោគថៃ បានបោះទុនវិនិយោគ ១៣ពាន់លានដុល្លារ នៅក្រៅប្រទេស កាលពីឆ្នាំ២០១៦ និងទទួលបានការបោះទុនវិនិយោគពីបរទេសចូលមកវិញ ត្រឹមតែ ១,៦ពាន់លានដុល្លារប៉ុណ្ណោះ។ នេះបើតាមសន្និសីទអង្គការសហប្រជាជាតិស្ដីពីពាណិជ្ជកម្ម និងការអភិវឌ្ឍ។ ចំណែកពីខែមករា ដល់មេសា ២០១៧ ការបោះទុកវិនិយោគរបស់ថៃ នៅក្រៅប្រទេសមានចំនួន ២,៩លានដុល្លារ។

ស្ថិតិរបស់សន្និសីទអង្គការសហប្រជាជាតិស្ដីពីពាណិជ្ជកម្ម និងការអភិវឌ្ឍ

ក្នុងនោះ ក្រុមហ៊ុនផលិតស៊ីម៉ង់របស់ថៃ ដ៏ធំជាងគេនៅអាស៊ី Siam Cement បានបោះទុន ៤៤០លានដុល្លារ បង្កើតរោងចក្រផលិតស៊ីម៉ង់នៅក្នុងប្រទេសវៀតណាម កាលពីខែមីនា ២០១៧។ ចំណែកក្រុមហ៊ុនដ៏ធំរបស់ថៃមួយទៀត BCPG Pcl បានបោះទុនវិនិយោគ ៣៥៨លានដុល្លារ នៅក្នុងប្រទេសសិង្ហបុរី ដោយសហការជាមួយសិង្ហបុរី Star Energy Group Holdings លើគម្រោងថាមពលស្អាត។

ការកើនឡើងនូវការបោះទុនវិនិយោគរបស់ក្រុមហ៊ុនថៃ នៅក្រៅប្រទេសនេះ គឺក្រោយរដ្ឋាភិបាលយោធាថៃបានគ្រប់គ្រងអំណាច ហើយសេដ្ឋកិច្ចរបស់ថៃបានធ្លាក់ចុះ។ ជាងនេះទៀត គឺប្រជាជនថៃបានកាត់បន្ថយការចំណាយរបស់ខ្លួន ដែលធ្វើឲ្យក្រុមហ៊ុនរបស់ថៃ បានងាកទៅរកទីផ្សារនៅក្រៅប្រទេសជំនួសវិញ។

ប៉ុន្តែបើតាមលោក Eugene Gong អ្នកធនាគារ Deutsche Bank AG ប្រចាំតំបន់អាស៊ីអាគ្នេយ៍ បានបញ្ជាក់ថា ការបោះទុនវិនិយោគរបស់ក្រុមហ៊ុនថៃនៅក្រៅប្រទេសនេះ គឺជាមហិច្ឆតាបន្ថែមទៀតរបស់ក្រុមហ៊ុនទាំងនោះ ក្នុងការស្វែងរកជោគជ័យនៅក្នុងតំបន់ និងសកលលោក។

សូមបញ្ជាក់ថា ចរន្តពាណិជ្ជកម្មរបស់ថៃ គឺផ្ទុយពីប្រទេសឥណ្ឌូណេស៊ី ម៉ាឡេស៊ី និងសិង្ហបុរីដែលបានកាត់បន្ថយការបោះទុនវិនិយោគរបស់ខ្លួន ទៅក្រៅប្រទេស កាលពីឆ្នាំ២០១៦៕

ប្រភព៖ Bangkokpost ប្រែសម្រួល៖ វាសនា