“ស្រមោលស្នេហ៍" បទចម្រៀងដែលអាចចាប់កំណើតតាំងពីសតវត្សរ៍ទី១៨

2017-07-21 10:27:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅកម្ពុជា បទចម្រៀង "ស្រមោលស្នេហ៍" ដែលច្រៀងដោយលោក ស៊ីន ស៊ីសាមុត បានផលិតនិងចេញលក់នៅទសវត្សរ៍ឆ្នាំ ១៩៦០។

តាមរយៈបទនេះ អ្នកនិពន្ធបានរំលេចអោយអ្នកស្តាប់ បានដឹងពីទឹកចិត្តស្នេហារបស់បុរសម្នាក់ ដែលអង្គុយរង់ចាំនារីជាទីស្រឡាញ់របស់ខ្លួន តាំងពីថ្ងៃហៀបអស្តង្គតរហូតដល់យប់ជ្រៅ។ ទោះអង្គុយចាំរហូតដល់ សន្សើមធ្លាក់ជោគប្រាណក៏នៅតែចាំ ព្រោះចាប់ពីថ្ងៃស្អែកទៅ ពួកគេនឹងលែងបានជួបគ្នាទៀតហើយ……

ផ្ទុយពីទំនុកច្រៀងជាភាសាខ្មែរ ទំនុកច្រៀងដើមនៃបទចម្រៀងនេះ បានច្រៀងរៀបរាប់អំពី ជីវិតរបស់ជនមួយចំនួន ដែលត្រេកត្រអាលនឹងអំពើអបាយមុខ និង ដើរខុសគន្លងធម៌នៅរដ្ឋ New Orleans នៃសហរដ្ឋអាមេរិក។ បទនេះ មានចំណងជើងថា The House of The Rising Sun ។

ដូចជាកំណាព្យបែប Classic ដទៃទៀតដែរ ដើមកំណើត ឬការតែងនិពន្ធ របស់បទចម្រៀងនេះ មិនមានភាពច្បាស់លាស់ទេ។ ប៉ុន្តែអ្នកតន្រ្តីវិទ្យានិយាយថា បទចម្រៀងនេះ ប្រហែលជាកើតឡើងនៅសតវត្សរ៍ទី១៨ និងត្រូវបានជនអន្តោប្រវេសន៍អង់គ្លេស នាំមកកាន់សហរដ្ឋអាមេរិកនៅពេលដែលពួកគេមក តាំងទីលំនៅនៅរដ្ឋ New Orleans។

ផ្ទុយពីការលើកឡើងខាងដើម លោក Alan Price តន្ត្រីករនៅក្នុងក្រុមតន្ត្រី The Animals និយាយថា បទចម្រៀងនេះគឺជាបទចម្រៀងប្រជាប្រិយរបស់អង់គ្លេស ដែលមានដើមកំណើតតាំងពីសតវត្សរ៍ទី១៦មកម្ល៉េះ។

តាមឯកសារដែលស្រាវជ្រាវបាន និងមានសម្លេងនៅសល់ បទចម្រៀង The House of The Rising Sun ត្រូវបាន គេយកមកច្រៀងតាំងពីឆ្នាំ ១៩៣៤ មកម៉្លេះ។

ប៉ុន្តែ បទចម្រៀងនេះ បានទទួលប្រជាប្រិយភាពយ៉ាងខ្លាំងបំផុតនៅឆ្នាំ១៩៦៤ គឺនៅពេលដែលក្រុម The Animals របស់អង់គ្លេស យកបទនេះមកច្រៀងជាថ្មី។ House of The Rising Sun បានជាប់ចំណាត់ថ្នាក់លេខ១នៅចក្រភអង់គ្លេស សហរដ្ឋអាមេរិក ស៊ុយអ៊ែត ហ្វាំងឡង់ និងកាណាដា។

នៅឆ្នាំ១៩៦៤ដដែល នៅឯប្រទេសបារាំងឯណោះវិញ បទចម្រៀងដែលមានលំនាំដូចគ្នានេះ ត្រូវបានអ្នកចម្រៀងបារាំង Johnny Hallyday យកទៅច្រៀង ហើយទទួលបានប្រជាប្រិយភាព និងជាប់ចំណាត់លេខ១នៅប្រទេសបារាំងដែរ។ ជាភាសាបារាំង បទចម្រៀងនោះមានចំណងជើងថា Le Pénitencier ដែលមាន ន័យជាភាសាខ្មែរថា "មណ្ឌលកែប្រែ" ឬ "មន្ទីរឃុំឃាំង"។

ដូចគ្នានឹងទំនុកច្រៀងជាភាសាអង់គ្លេសដែរ Le Pénitencier ច្រៀងរៀបរាប់អំពីជីវិតរបស់កូនប្រុសម្នាក់ដែលត្រេកត្រអាលនឹងអំពើអបាយមុខ និង ដើរខុសគន្លងធម៌ ហើយបន្ទាប់មក ត្រូវបានគេចាប់យកទៅដាក់នៅក្នុងមណ្ឌលកែប្រែ។ ទាល់តែពេលដែលខ្លួនស្ថិតនៅក្នុងមណ្ឌលកែប្រែ ទើបកូនប្រុសមានវិប្បដិសារៈ និងនឹកដល់ម្តាយដែលតែងតែយកចិត្តទុកដាក់ថែរក្សា និង ណែនាំខ្លួន។

រលកសកលភាវូបនីយកម្ម បានបក់ផាត់នាំយកបទចម្រៀងបរទេសទាំងនេះ មកដល់កម្ពុជា។ ប៉ុន្តែមិនមានប្រភពណាមួយបញ្ជាក់ថា តើបទចម្រៀង "ស្រមោលស្នេហ៍" របស់លោកស៊ីន ស៊ីសាមុត ទទួលឥទ្ធិពលពីបទចម្រៀងណាមួយក្នុងចំណោមបទទាំងពីរខាងលើនោះទេ៕

អត្ថបទ៖ ឃុត សុខឿន