ធនាគារជាតិ៖ កំណើនសេដ្ឋកិច្ចកម្ពុជានៅឆមាសទី១ កើនបាន ៧%

2017-07-23 08:26:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទេសាភិបាលធនាគារជាតិនៃកម្ពុជា បានលើកឡើងថា សកម្មភាពសេដ្ឋកិច្ចកម្ពុជា នៅឆមាសទី១ ឆ្នាំ២០១៧នេះ ត្រូវបានប៉ាន់ស្មានថានឹងមានកំណើន ៧% ដែលរួមចំណែកជាចម្បងដោយកំណើនវិស័យកាត់ដេរ សំណង់ អចលនទ្រព្យ និងទេសចរណ៍។

លោក ជា ចាន់តូ ទេសាភិបាលធនាគារជាតិនៃកម្ពុជា

នេះជាការលើកឡើងរបស់ទេសាភិបាលធនាគារជាតិនៃកម្ពុជា លោក ជា ចាន់តូ ក្នុងឱកាសបើកសន្និបាតបូកសរុបលទ្ធផលការងារប្រចាំឆ្នាំឆមាសទី១ និងទិសដៅការងារឆមាសទី២ ឆ្នាំ២០១៧ កាលពីព្រឹកថ្ងៃទី២២ កក្កដា ២០១៧ នៅមជ្ឈមណ្ឌលសន្និបាត និងពិព័រណ៍កោះពេជ្រ។

លោកបានមានប្រសាសន៍ថា ភាពរីកចម្រើននេះ កើនឡើងព្រមគ្នាជាមួយនឹងភាពប្រសើរឡើងនៃសេដ្ឋកិច្ចពិភពលោក។ ភាពប្រសើរឡើងនេះ ជាចម្បងដោយសារការបន្តកើនឡើងនៃកំណើនសេដ្ឋកិច្ចនៅក្នុងប្រទេសអភិវឌ្ឍន៍ ជាពិសេសសហរដ្ឋអាមេរិក តំបន់អឺរ៉ុប និងជប៉ុន ខណៈប្រទេសចិន ល្បឿនកំណើនបានបន្ដថយចុះបន្តិចបន្តួចដូចការរំពឹងទុក។

លោកបានបន្ថែមថា វិស័យកាត់ដេរនៅតែបន្តរួមចំណែកចម្បងក្នុងកំណើន ថ្វីត្បិតតែអត្រាកំណើនបានថមថយបន្តិចក៏ដោយក្នុងពេលដែលវិស័យសំណង់បន្តមានកំណើនរឹងមាំ ហើយវិស័យទេសចរណ៍មានសន្ទុះកំណើនគួរឲ្យកត់សម្គាល់។ ចំណែកវិស័យកសិកម្ម កំណើនបានបន្តងើបឡើងទន់ខ្សោយនៅឡើយ។ ទន្ទឹមនឹងនេះ ស្ថិរភាពម៉ាក្រូសេដ្ឋកិច្ច និងស្ថិរភាពហិរញ្ញវត្ថុត្រូវបានរក្សាយ៉ាងរឹងមាំ ដែលជាមូលដ្ឋានគាំទ្រដល់ការរីកចម្រើនរបស់សកម្មភាពសេដ្ឋកិច្ចនាពេលខាងមុខ៕