CNRP នឹងប្រើប្រាស់ត្រឹមរូបសញ្ញាព្រះអាទិត្យរះ

2017-07-24 03:12:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សឆាំងនឹងប្រជុំផ្ទៃក្នុងជាមួយមន្ត្រីជាន់ខ្ពស់របស់ខ្លួនទូទាំងប្រទេស នៅថ្ងៃទី២៥ ខែកក្កដា ដើម្បីប្រាប់អំពីការឈប់ប្រើប្រាស់រូបលោក សម រង្ស៊ី និងលោក កឹម សុខា តទៅទៀត ដោយប្រើប្រាស់ត្រឹមរូបសញ្ញាព្រះអាទិត្យរះ។

អនុប្រធានគណបក្សសង្គ្រោះជាតិ លោក អេង ឆៃអ៊ាង ឲ្យអាស៊ីសេរី ដឹងនៅថ្ងៃទី២២ ខែកក្កដា ថា កិច្ចប្រជុំនោះគណបក្សនឹងណែនាំទៅថ្នាក់ដឹកនាំទាំង២៥ខេត្ត រាជធានី ពីការឈប់ប្រើរូបទាំងនោះនៅលើបដាផ្សព្វផ្សាយរបស់គណបក្ស។ ទាក់ទងការចំណាយលើការផ្លាស់ប្ដូរនេះ លោក អេង ឆៃអ៊ាង ថាគណបក្សមិនបានគិតពីការចំណាយទេ ព្រោះនេះជាការចូលរួមពីពលរដ្ឋ និងអ្នកគាំទ្រគណបក្ស។

ថ្នាក់ដឹកនាំគណបក្សសង្គ្រោះជាតិ ក្នុងសមាជវិសាមញ្ញគណបក្ស១ ថ្ងៃទី២ ខែមីនា ឆ្នាំ២០១៧

លោក អេង ឆៃអ៊ាង ឲ្យដឹងទៀតថា គណៈកម្មាធិការអចិន្ត្រៃយ៍នៃគណបក្សសង្គ្រោះជាតិ បានសម្រេចប្រើតែស្លាកសញ្ញារបស់គណបក្ស គឺរូបព្រះអាទិត្យរះ តាំងពីសប្ដាហ៍ទី២ នៃខែកក្កដា នេះ។

ចំណែកតំណាងរាស្ត្រ និងជាសមាជិកគណៈកម្មការអចិន្ត្រៃយ៍នៃគណបក្សសង្គ្រោះជាតិ លោ គីមសួរ ភីរិទ្ធ ឲ្យដឹងថា ការផ្លាស់ប្ដូររូបដោយដាក់ស្លាកសញ្ញាគណបក្សសង្គ្រោះជាតិ ទូទាំងប្រទេស មកដល់ពេលនេះទើបបានប្រមាណ ១០ភាគរយប៉ុណ្ណោះ។ លោកថា ក្រោយលទ្ធផលកិច្ចប្រជុំថ្ងៃទី២៥ ខាងមុខ គណបក្សនឹងមានជួនដំណឹងជាផ្លូវការ ណែនាំទៅសាខាបក្សទាំងក្នុង និងក្រៅប្រទេស មិនឲ្យធ្វើអ្វីដែលច្បាប់គណបក្សនយោបាយថ្មីហាមឃាត់។

អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការដែលគណបក្សប្រឆាំងមានផែនការច្បាស់លាស់ក្នុងការផ្លាស់ប្ដូររូបភាព សញ្ញា និងឈ្មោះ ដែលជាប់ទាក់ទងនឹងលោក សម រង្ស៊ី ព្រោះគណបក្សនេះដឹងថា ខ្លួនមិនអាចរារាំងច្បាប់គណបក្សនយោបាយថ្មីបាន៕

ប្រភព៖ Radio Free Asia ប្រែសម្រួល៖ សំភី