AFC ពិន័យកីឡាករអាស៊ាន២នាក់ នៅវគ្គជម្រុះ U23

2017-07-24 08:54:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធកីឡាបាល់ទាត់ទ្វីបអាស៊ី ហៅកាត់ AFC បានចេញសេចក្ដីសម្រេចរបស់គណៈកម្មាធិការសីលធម៌ និងវិន័យ កាលពីថ្ងៃទី២១ ខែកក្កដា ឆ្នាំ២០១៧ ដោយដាក់ពិន័យលើកីឡាកររបស់ក្រុម U23 សិង្ហបុរីម្នាក់ និងក្រុម U23 ឥណ្ឌូណេស៊ីម្នាក់ ចំពោះទង្វើរបស់ពួកគេនៅលើទីលាន។

អ្នកចាំទី U23 សិង្ហបុរី Muhammad Zharfan Bin Rohaizad ត្រូវបានបណ្ដេញចេញពីទីលានក្នុងការប្រកួតរវាងក្រុមសិង្ហបុរី ជាមួយមីយ៉ាន់ម៉ា កាលពីថ្ងៃទី១៩កក្កដា បន្ទាប់ពីរូបគេបានប្រើដៃដាល់ចំក្បាលកីឡាករនៃក្រុមគូប្រកួត។ ចំពោះទង្វើនេះ AFC បានសម្រេចពិន័យរូបគេ មិនឲ្យចូលលេង ២ប្រកួតបន្ទាប់ ហើយពិន័យជាប្រាក់ចំនួន ១០០០ដុល្លារ។ ប្រសិនបើ Rohaizad ប្រព្រឹត្តអំពើដដែល AFC នឹងពិន័យធ្ងន់ធ្ងរជាងមុនថែមទៀត។

អ្នកចាំទី Muhammad Zharfan Bin Rohaizad ឈរនៅកណ្ដាល

ចំណែក កីឡាកររបស់ក្រុម U23 ឥណ្ឌូណេស៊ី Asnawi Mangkualam Bahar ទទួលបានកាតក្រហមពីអាជ្ញាកណ្ដាល បន្ទាប់ពីបញ្ចេញសកម្មភាពហិង្សាទាត់ទៅលើកីឡាករគូប្រកួតដោយចេតនា នៅពេលព្យាយាមដណ្ដើមបាល់ ក្នុងការប្រកួតរវាងក្រុមឥណ្ឌូណេស៊ី ជាមួយម៉ាឡេស៊ី កាលពីថ្ងៃទី១៩កក្កដា។ រូបគេ ត្រូវបានពិន័យដូចគ្នានឹងកីឡាករ U23 របស់សិង្ហបុរីខាងលើផងដែរ។

កីឡាករ Asnawi Mangkualam Bahar

សូមបញ្ជាក់ថា U23 សិង្ហបុរី និង U23 ឥណ្ឌូណេស៊ី សុទ្ធតែធ្លាក់ចេញពីព្រឹត្តិការណ៍ AFC U23 Championship ដែលគ្រោងធ្វើឡើងនាខែមករា ឆ្នាំ២០១៨ ខាងមុខនេះ នៅប្រទេសចិន៕

ប្រភព៖ AFC ប្រែសម្រួល៖ លាភ.