អ្នកគាំទ្របាល់ទាត់ចិននៅកម្ពុជា មានចំណុចល្អ ៣ ដែលគួរយកគំរូតាម

2017-07-25 02:25:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមបាល់ទាត់ U23 ចិន បានបង្កភាពភ្ញាក់ផ្អើល ដោយបំបាក់ក្រុមខ្លាំង U23 ជប៉ុន ២-១ ក្នុងប្រកួតចុងក្រោយនៃវគ្គជម្រុះ AFC U23 Championship នៅកម្ពុជា កាលពីថ្ងៃអាទិត្យកន្លងទៅ។ លទ្ធផលនេះ បានធ្វើឲ្យ ចិន ឈរលេខ ១ ក្នុងពូល J រុញជប៉ុនឲ្យទៅឈរលេខ ២ វិញ។

អ្វីដែលធ្វើឲ្យគេចាប់អារម្មណ៍មួយទៀត គឺអ្នកគាំទ្រចិន បានទៅទស្សនាផ្ទាល់ ដោយបន្លឺសំឡេងហ៊ោកញ្ជ្រៀវកក្រើកពហុកីឡដ្ឋានជាតិ (អូឡាំពិក)។ ត្បិតមិនមានចំនួនច្រើន ដូចអ្នកគាំទ្រម្ចាស់ផ្ទះកម្ពុជា ប៉ុន្តែអ្នកគាំទ្រចិន បានធ្វើឲ្យកីឡាកររបស់ខ្លួនមានសន្ទុះយ៉ាងខ្លាំងនៅលើទីលាន ចំណែកឯកាណុងកាម៉េរ៉ារបស់អ្នកថតរូប ក៏មិនភ្លេចថតពួកគេដែរ ដោយសារពួកគេ មានចំណុចល្អ២ គួរយកគំរូតាម៖

ទី១៖ ពួកគេបានប្រមូលផ្ដុំគ្នា ពាក់អាវពណ៌ក្រហមដូចគ្នា មានទង់ជាតិស្ទើរគ្រប់ដៃ មើលទៅទាក់ភ្នែកយ៉ាងខ្លាំង។ ពួកគេមិនមែនទៅអង្គុយមើលធម្មតាយ៉ាងស្ងៀមស្ងាត់នោះទេ គឺពួកគេបានបន្លឺសំឡេងស្រែកហ៊ោកញ្ជ្រៀវពេញមួយប្រកួត ក្រោកឈរទះដៃស្រុះគ្នា ដើម្បីជម្រុញទឹកចិត្តកីឡាករនៅលើទីលាន។ ពួកគេមានគ្នាមិនដល់ខ្ទង់ពាន់នាក់នោះទេ ប៉ុន្តែអាចហ៊ោឡើងកក្រើកពហុកីឡដ្ឋាន។ សាកស្រមៃទៅមើល បើអ្នកគាំទ្រខ្ទង់ម៉ឺននាក់របស់ក្រុមម្ចាស់ផ្ទះ អាចហ៊ោបានស្រុះគ្នាដូចពួកគេ តើនឹងកក្រើកប៉ុណ្ណាទៅ?

ទី២៖ ពួកគេបានប្រើស្គរ វាយជាចង្វាក់ ដើម្បីស្រែកហ៊ោ ស្រែកច្រៀងបានស្រុះគ្នា មិនមែនប្រើ speaker ដើម្បីចាក់បទបែកស្លុយ ដើម្បីរាំរែក អំឡុងពេលកីឡាករកំពុងប្រកួតនោះទេ។ មួយវិញទៀត ពួកគេបានបង្ហាញការសាមគ្គីគ្នា មិនប៉ះទង្គិចគ្នា មិនវាយតប់ ឬរុញច្រើនគ្នា ធ្វើឲ្យអាប់ឱនកិត្តិយស និងភាពថ្លៃថ្នូររបស់ជាតិឡើយ។

ទី៣៖ ក្រោយចប់ការប្រកួត ពួកគេបាននាំគ្នាប្រមូលសំរាមអស់ពីកៅអី ទើបនាំគ្នាចាកចេញ។ កន្លងមក គេសង្កេតឃើញអ្នកគាំទ្រកម្ពុជាយើងមួយចំនួនធំ ក៏បានប្រមូលសំរាមដូចគ្នានេះដែរ ប៉ុន្តែនៅមានអ្នកគាំទ្រមួយចំនួនតូច ដែលបានបន្សល់សំរាមនៅពាសពេញកន្លែងអង្គុយ។

គួរបញ្ជាក់ថា លទ្ធផលប្រកួតក្នុងពូល J នៃវគ្គជម្រុះ AFC U23 Championship គឺ U23 ចិន មាន ៧ ពិន្ទុ, U23 ជប៉ុន មាន ៦ ពិន្ទុ (ជាប់ក្នុងនាមជាក្រុមលេខ២ ល្អបំផុតមួយ) U23 កម្ពុជា មាន ៤ពិន្ទុ និង U23 ហ្វីលីពីន ០ ពិន្ទុ៕