សហគមន៍ចំនួន២ ប្រមូលផ្ដុំតវ៉ា នៅព្រឹកនេះ
- 2017-07-25 03:14:56
- ចំនួនមតិ 0 | ចំនួនចែករំលែក 0
សហគមន៍ចំនួន២ ប្រមូលផ្ដុំតវ៉ា នៅព្រឹកនេះ
ចន្លោះមិនឃើញ
នៅព្រឹកថ្ងៃទី២៥ ខែកក្កដានេះ ប្រជាពលរដ្ឋសហគមន៍ដីធ្លីបឹងកក់ បាននាំគ្នាដាក់ញ្ញត្តិតាមស្ថានទូតមួយចំនួនដូចជា ទូតជប៉ុន អាល្លឺម៉ង់ អាមេរិក បារាំង អង់គ្លេស ដើម្បីសុំអន្តរាគមន៍ទៅរដ្ឋាភិបាលឲ្យមានការដោះលែងអ្នកស្រី ទេព វន្នី តំណាងសហគមន៍បឹងកក់។ ការដើរដាក់ញត្តិសុំអន្តរាគមន៍នេះ គឺនៅពេលដែលសាលាឧទ្ធរណ៍គ្រោងនឹងបើកសវនាការនៅថ្ងៃទី២៧ ខែកក្កដា ឆ្នាំ២០១៧ ខាងមុខនេះ។ ការដើរដាក់ញត្តិនេះ គឺមិនមានការរារាំងពីសំណាក់អាជ្ញាធរមានសមត្ថកិច្ចនោះទេ។
ចំណែកនៅព្រឹកថ្ងៃដដែលនេះ ប្រជាពលរដ្ឋសហគមន៍ព្រែកតាគង់១ ស្ថិតសង្កាត់ចាក់អង្រែលើ ខណ្ឌមានជ័យ និងភូមិខ្វា សង្កាត់ដង្កោ ខណ្ឌដង្កោ ប្រមាណ ៧០នាក់ បាននាំគ្នាមកតវ៉ាមុខសាលារាជធានីភ្នំពេញ ដើម្បីស្នើសុំដោះស្រាយការកាត់ដីរបស់អ្នកសហគមន៍ចេញពីគម្រោងអភិវឌ្ឍន៍របស់ក្រុមហ៊ុន អាយ អិន ជី ហូលឌី និងសុំប័ណ្ណកម្មសិទ្ធិដីធ្លី តាមចំណាត់ការរបស់ក្រសួងរៀបចំដែនដីនគរូបនីយកម្ម និងសំណង់ ដែលបានឲ្យសាលារាជធានីចាត់ចែងជូនប្រជាសហគមន៍ទាំងពីរ។ នៅក្នុងការប្រមូលផ្តុំនេះ ប្រជាពលរដ្ឋបានលើកបដា និងស្រែកទាមទារឲ្យសាលារាជធានីភ្នំពេញ ដោះស្រាយឲ្យពួកគាត់។ យោងតាមលិខិតចុះថ្ងៃទី០២ ខែមីនា ឆ្នាំ២០១៧ របស់ក្រសួងដែនដី នគរូបនីយកម្ម និងសំណង់ បានធ្វើលិខិតទៅអភិបាលរាជធានីភ្នំពេញ ធ្វើការពិនិត្យដោះស្រាយករណីនេះ។ ប៉ុន្តែរហូតមកដល់ពេលនេះ នៅមិនទាន់មានដំណោះស្រាយនៅឡើយទេ៕