គម្រោងផ្លូវល្បឿនលឿន ភ្នំពេញ-បាវិត ត្រូវសិក្សាជាថ្មី ក្រោយរដ្ឋាភិបាលថាថ្លៃពេក

2017-07-25 07:45:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវល្បឿនលឿន រាជធានីភ្នំពេញ - ក្រុងបាវិត ខេត្តស្វាយរៀង ដែលដាក់ឲ្យសិក្សាក្នុងអំឡុងឆ្នាំ២០១៥ ត្រូវបានរដ្ឋាភិបាលសម្រេចឲ្យក្រុមអ្នកជំនាញការជប៉ុនសិក្សាគម្រោងឡើងវិញ ដែលរហូតមកដល់ពេលនេះ នៅមិនទាន់បានបញ្ចប់ដំណាក់កាលសិក្សាគម្រោងនៅឡើយទេ។ លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូន អះអាងថា គម្រោងនេះ ត្រូវចំណាយថវិកាខ្ពស់ពេក និងត្រូវប្រើរយៈពេលយូរ។

អ្នកនាំពាក្យរូបនេះ បញ្ជាក់ថា ការដោះស្រាយផលប៉ះពាល់ពីគម្រោងនេះ នឹងត្រូវបង្ហាញឡើង នៅក្រោយរដ្ឋាភិបាលអនុម័តជាផ្លូវការ ក៏ប៉ុន្តែនៅពេលនេះ គឺស្ថិតក្នុងការសិក្សាគម្រោងឡើងវិញ ទាំងបច្ចេកទេស និងតម្លៃ។

យ៉ាងណាក៏ដោយ ការស្ថាបនាផ្លូវល្បឿនលឿននេះ ត្រូវបានអ្នកជំនាញអះអាងថា មានសារៈសំខាន់ណាស់ ដើម្បីសម្រួលដល់ការដឹកជញ្ជូន និងការធ្វើដំណើររបស់ប្រជាពលរដ្ឋពីភ្នំពេញ ទៅកាន់ព្រំប្រទល់កម្ពុជា-វៀតណាម ឲ្យកាន់តែងាយស្រួល ស្របពេលដែលផ្លូវជាតិលេខ១ មានការមមាញឹកខ្លាំង ទាំងការធ្វើដំណើររបស់ប្រជាពលរដ្ឋ និងការដឹកជញ្ជូនទំនិញឆ្លងដែន។

ស្ពានអ្នកលឿង នៃផ្លូវជាតិលេខ១ ដែលជាផ្លូវភ្ជាប់ពីរាជធានីភ្នំពេញ ទៅព្រំដែនវៀតណាមនាពេលបច្ចុប្បន្ន

តាមការសិក្សាលើកទី១ គម្រោងផ្លូវល្បឿនលឿនពីភ្នំពេញ-បាវិតនេះ មានប្រវែង **១៦០គីឡូម៉ែត្រ** ត្រូវចំណាយរហូតដល់ជិត **៣ពាន់លានដុល្លារ** និងគ្រោងបញ្ចប់នៅ **ឆ្នាំ ២០៣៣**។ ក្រៅពីផ្លូវល្បឿនលឿនពីភ្នំពេញ ទៅក្រុងបាវិតនេះ រដ្ឋាភិបាលកម្ពុជា ក៏គ្រោងសាងសង់ផ្លូវល្បឿនលឿនពីភ្នំពេញ ទៅខេត្តព្រះសីហនុផងដែរ៕

ចុចអានអត្ថបទទាក់ទង៖