ស្ករត្នោតគ្មានជាតិគីមី ផលិតបានតែ ៥ខែប៉ុណ្ណោះ ក្នុងមួយឆ្នាំ
- 2017-08-17 14:31:13
- ចំនួនមតិ 0 | ចំនួនចែករំលែក 0
ស្ករត្នោតគ្មានជាតិគីមី ផលិតបានតែ ៥ខែប៉ុណ្ណោះ ក្នុងមួយឆ្នាំ
ចន្លោះមិនឃើញ
ស្ករត្នោត ដែលផលិតដោយប្រជាសហគមន៍ តាមបែបប្រពៃណី និងធម្មជាតិ ដោយមិនប្រើប្រាស់សារជាតិគីមី គឺរដូវកាលផលិត បានត្រឹមតែ ៥ខែប៉ុណ្ណោះ ក្នុង១ឆ្នាំ ដោយចាប់ពីខែមករា ដល់ខែឧសភា។
លោក កែវ ចិត្រ នាយកប្រតិបត្តិស្ករត្នោតធម្មជាតិសញ្ញាត្នោតមាស បានឲ្យដឹងថា សព្វថ្ងៃនេះ ស្ករត្នោត ដែលក្រុមហ៊ុនរបស់លោកទទួលទិញផ្ទាល់ពីប្រជាសហគមន៍ កំពុងលក់នៅផ្សារទំនើប ចំនួន ៩០ នៅក្នុងប្រទេសកម្ពុជា ពិសេសនៅរាជធានីភ្នំពេញ។ ស្ករត្នោតទាំងនោះ ក៏ត្រូវបានស្តុកទុកចំនួន ១០តោន នៅតាមសហគមន៍ផងដែរ ដើម្បីបម្រើឲ្យការផ្គត់ផ្គង់ទីផ្សារ បន្ទាប់ពីផុតរដូវផលិតស្ករត្នោត។
លោក កែវ ចិត្រ បន្តថា ក្រុមហ៊ុនត្នោតមាសរបស់លោក បានទិញស្ករត្នោត ពីប្រជាសហគមន៍ ក្នុងតម្លៃ ១ គីឡូក្រាម ៣៦០០រៀល។ ប្រជាសហគមន៍ ដែលផលិតស្ករត្នោត លក់ឲ្យក្រុមហ៊ុនរបស់លោក មាននៅខេត្តកំពង់ស្ពឺ ខេត្តពោធិ៍សាត់ និងខេត្តកំពង់ធំ។ ប្រជាកសិករ ដែលបានចងក្រងជាសហគមន៍ផលិតស្ករត្នោត ត្រូវធ្វើតាមស្តង់ដាររបស់ត្នោតមាស ដោយគិតពីការថែរក្សាសុខភាពរបស់ប្រជាពលរដ្ឋ តាមរយៈការមិនប្រើប្រាស់ថ្នាំគីមី មិនប្រើប្រាស់ស្ករស និងមិនលាយពណ៌ ជាដើម ពោលគឺប្រជាកសិករ ត្រូវរំងាស់ទឹកត្នោត រីងអស់ បានស្ករប៉ុណ្ណា គឺប៉ុណ្ណឹង។
ជាមួយគ្នានោះ ប្រធានក្រុមហ៊ុនស្ករត្នោតធម្មជាតិ សញ្ញាត្នោតមាស ក៏បានលើកឡើងពីបញ្ហាប្រឈមមួយចំនួនរបស់ផលិតផលស្ករត្នោតផងដែរ គឺការកាប់ដើមត្នោត កសិករបោះបង់មុខរបរឡើងត្នោត ការធ្វើចំណាកស្រុក និងការផលិតស្ករត្នោតចំណាយថ្លៃដើមកាន់តែឡើងខ្ពស់ ដោយប្រជាកសិករ ពិបាករកអុស ដើម្បីដុតរំងាស់ទឹកត្នោត ជាដើម៕