ម្រេចកំពត មាន៣ប្រភេទ នាំចេញទៅអឺរ៉ុប អាមេរិក ជប៉ុន និងចិន
- 2017-08-21 14:01:35
- ចំនួនមតិ 0 | ចំនួនចែករំលែក 0
ម្រេចកំពត មាន៣ប្រភេទ នាំចេញទៅអឺរ៉ុប អាមេរិក ជប៉ុន និងចិន
ចន្លោះមិនឃើញ
ម្រេចកំពត មាន ៣ ប្រភេទ រួមមាន៖ ម្រេចខ្មៅ ម្រេចក្រហម និងម្រេចស។ ម្រេចកំពត ទាំង ៣ប្រភេទនេះ ត្រូវបាននាំចេញទៅលក់នៅអឺរ៉ុប អាមេរិក ជប៉ុន និងកំពុងពង្រីកទីផ្សារ ទៅកាន់ប្រទេសចិន។
លោក ហ៊ួត ឡាយ ប្រធានសមាគមលើកកម្ពស់ម្រេចកំពត បានឲ្យដឹងថា តម្លៃម្រេចកំពត មានតម្លៃខុសគ្នា ទៅតាមប្រភេទនីមួយៗ ក្នុងនោះ តម្លៃ ១៥ដុល្លារ ក្នុងមួយគីឡូក្រាម សម្រាប់ម្រេចខ្មៅ ២៥ ដុល្លារ សម្រាប់ម្រេចក្រហម និង ២៨ដុល្លារ សម្រាប់ម្រេចស។
លោក ហ៊ួត ឡាយ មានប្រសាសន៍ថា ក្នុងចំណោមផ្ទៃដីដាំម្រេចជាង ២០០ហិកតា គឺដំណាំម្រេចជាង ១០០ ហិកតា កំពុងត្រៀមប្រមូលផល។ ក្នុងរយៈពេល ៨ខែ ក្នុងឆ្នាំ២០១៧នេះ ប្រជាកសិករ បានប្រមូលផលម្រេចកំពត ដែលមានគុណភាពខ្ពស់បាន ៨០តោន ក្នុងនោះ ជាង ៤០ តោន ត្រូវបានលក់ចេញទៅកាន់ទីផ្សារអន្តរជាតិ។
ម្រេចកំពត ត្រូវបានចុះបញ្ជីនៅលើទីផ្សារសហភាពអឺរ៉ុប ជាផលិតផលសម្គាល់ភូមិសាស្ត្រ ក្នុងឆ្នាំ២០១៦។ ការចុះបញ្ជីជាផលិតផលសម្គាល់ភូមិសាស្ត្រនេះ នាំឲ្យម្រេចកំពត ត្រូវបានការពារ និងទទួលបានការបន្ថែមគុណតម្លៃទៅលើកេរ្តិ៍ឈ្មោះ ជាប្រពៃណីរបស់ម្រេចកំពត។
ផលិតផលសម្គាល់ភូមិសាស្ត្រខេត្តកំពតនេះ បានរកចំណូលប្រចាំឆ្នាំប្រហែល ១លានដុល្លារ។ បច្ចុប្បន្ន សមាគមម្រេចកំពត មានសមាជិកកើនដល់ជិត ៤០០គ្រួសារ និងកំពុងសហការជាមួយដៃគូវេចខ្ចប់ក្នុងស្រុក ចំនួន ២១ក្រុមហ៊ុន សម្រាប់នាំចេញទៅផ្សារអន្តរជាតិ។
ចម្ការម្រេចកំពត ស្ថិតក្នុងភូមិអង្គរជ័យ ឃុំដំណាក់កន្ទួតត្បូង ស្រុកកំពង់ត្រាច ខេត្តកំពត ដែលមានចម្ងាយប្រមាណ ៧៥គីឡូម៉ែត្រ ភាគខាងត្បូងទីរួមខេត្តកំពត។ សព្វថ្ងៃផ្ទៃដីដំណាំម្រេចកំពត ត្រូវបានពង្រីកពីជាង ១០ហិកតា ក្នុងអំឡុងឆ្នាំ២០០៨ ទៅដល់ជាង ២០០ ហិកតា ក្នុងឆ្នាំ២០១៧ នេះ៕