ផ្លូវការ! Zlatan ចុះកុងត្រានៅបិសាចក្រហមជាថ្មី
- 2017-08-24 13:43:19
- ចំនួនមតិ 0 | ចំនួនចែករំលែក 0
ផ្លូវការ! Zlatan ចុះកុងត្រានៅបិសាចក្រហមជាថ្មី
ចន្លោះមិនឃើញ
ខ្សែប្រយុទ្ធស៊ុយអែត Zlatan Ibrahimovic នឹងបន្តអាជីពបាល់ទាត់នៅក្លឹបបិសាចក្រហម Manchester United ដោយចុះកុងត្រារយៈពេល ១ឆ្នាំ។ នេះបើយោងតាមការចុះផ្សាយរបស់វិបសាយផ្លូវការរបស់ក្លឹប។
កីឡាករវ័យ ៣៥ឆ្នាំរូបនេះ ចូលលេងឲ្យ Man Utd ៤៦ប្រកួត និងស៊ុតបញ្ចូលទី ២៨គ្រាប់អំឡុងរដូវកាល ២០១៦-២០១៧ មុនរងរបួសជង្គង់ធ្ងន់ធ្ងរ មិនអាចលេងដល់ចប់រដូវកាល។
ក្រោយចុះកុងត្រាថ្មីនេះ Zlatan បាននិយាយថា៖ "ខ្ញុំត្រឡប់មកវិញដើម្បីបញ្ចប់នូវអ្វីដែលខ្ញុំបានចាប់ផ្ដើម។ ខ្ញុំអន្ទះសារចង់ជាន់ទីលាន Old Trafford ជាថ្មី ប៉ុន្តែខ្ញុំត្រូវការពេលវេលាដើម្បីធ្វើឲ្យប្រាកដថា ខ្ញុំរួចរាល់ក្នុងការចាប់ផ្ដើមជាថ្មី។ ខ្ញុំប្រឹងប្រែងខ្លាំងណាស់មួយរយៈនេះ ហើយនឹងប្រឹងបន្តទៀត មុនវិលចូលទីលានវិញ"។
ចំណែកអ្នកចាត់ការក្លឹប លោក Jose Mourinho បានថ្លែងឲ្យដែរថា៖ "យើងរីករាយណាស់ដែល Zlatan កាន់តែជិតជាសះស្បើយ ហើយយើងរីករាយណាស់ដែលអាចទទួលយកមហិច្ឆតា និងបទពិសោធន៍របស់គាត់ ត្រឡប់មកកាន់ក្លឹបវិញ។ ក្រោយការរួមចំណែករបស់គាត់កាលពីរដូវកាលមុន គាត់សមនឹងទទួលបានការទុកចិត្ត ហើយយើងនឹងអត់ធ្មត់ ដើម្បីរង់ចាំគាត់ចូលលេងវិញ។ ខ្ញុំច្បាស់ណាស់ថាគាត់នឹងក្លាយជាកីឡាករសំខាន់ នាពាក់រដូវកាលចុងក្រោយ"។
Zlatan នឹងពាក់អាវលេខ ១០ របស់ Wayne Rooney ដែលចាកចេញទៅ Everton ក្រោយពីអាវលេខ ៩ របស់គេកាលពីរដូវកាលមុន ត្រូវបានពាក់ដោយ Romelu Lukaku៕