សេវាឡានក្រុងសាធារណៈ នៅភ្នំពេញ នឹងបង្ហាញតាម APP ក្នុងទូរស័ព្ទដៃ

2017-08-28 23:37:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធររាជធានីភ្នំពេញ គ្រោងបង្កើតកម្មវិធីនៅក្នុងទូរស័ព្ទដៃស្មាតហ្វូន APP ដើម្បីបង្កលក្ខណៈ ងាយស្រួលឲ្យប្រជាពលរដ្ឋ ដែលប្រើប្រាស់សេវារថយន្តក្រុងសាធារណៈ។

បន្ទាប់ពីកិច្ចប្រជុំស្តីពីស្ថានភាពនៃការគ្រប់គ្រងរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) កាលពីព្រឹកថ្ងៃទី២៨ ខែសីហា ២០១៧ លោក មាស ម៉េតភក្តី អ្នកនាំពាក្យសាលារាជធានីភ្នំពេញ បានឲ្យដឹងថា ដើម្បីបង្កលក្ខណៈងាយស្រួលដល់ប្រជាពលរដ្ឋ ក្នុងការប្រើប្រាស់សេវារថយន្តក្រុងសាធារណៈ សាលារាជធានីភ្នំពេញ នឹងបង្កើតកម្មវិធីនៅក្នុងទូរស័ព្ទដៃស្មាតហ្វូន (APP) ដែលមានបង្ហាញពីពេលវេលា ទីតាំងចំណត និងតម្រាយផ្លូវធ្វើដំណើររបស់រថយន្តក្រុង ដែលប្រតិបត្តិការលើខ្សែរត់ទាំង៨ ក្នុងរាជធានីភ្នំពេញ។

លោក មាស ម៉េតភក្តី បន្តថា ក្រៅពីការគ្រោងបង្កើតកម្មវិធីនៅក្នុងទូរស័ព្ទដៃ ស្មាតហ្វូន (APP) សាលារាជធានីភ្នំពេញក៏នឹងគ្រោងបង្កើតប្រព័ន្ធទូទាត់បែបអេឡិចត្រូនិក ដោយប្រែពីការទូទាត់ជាសាច់ប្រាក់ មកជាការឆូតកាតវិញម្តង។

រហូតមកទល់ពេលនេះ អាជ្ញាធររាជធានីភ្នំពេញ បានកែសម្រួល និងបន្ថែមតម្រាយខ្សែរត់ថ្មីដល់រថយន្តក្រុងសាធារណៈ នៅភ្នំពេញ សរុបមាន ៨ខ្សែរត់។ ក្នុងនោះ ការកែសម្រួលតម្រាយផ្លូវ នៃខ្សែរត់ចាស់ ៤ខ្សែ សម្រាប់រថយន្តក្រុងសាធារណៈ នឹងចាប់ផ្តើមពីថ្ងៃទី១ ខែកញ្ញា ឆ្នាំ២០១៧ និងចាប់ពីថ្ងៃទី១ ខែតុលា ឆ្នាំ២០១៧ រថយន្តក្រុងសាធារណៈរបស់សាលារាជធានីភ្នំពេញ នឹងថែមខ្សែរត់ ៤ ខ្សែទៀត។

ប្រតិបត្តិការសេវាដឹកជញ្ជូនលើ ៨ខ្សែរត់នេះ រដ្ឋាករស្វយ័តដឹកជញ្ជូនសាធារណៈរថយន្តក្រុង គ្រោងប្រើប្រាស់រថយន្តក្រុងសរុប ១៥០គ្រឿង។ ក្នុងនោះ សម្រាប់មនុស្សចាស់ សិស្ស និស្សិត ជនពិការ និងព្រះសង្ឃ ជិះរថយន្តក្រុងសាធារណៈរបស់សាលារាជធានីភ្នំពេញ ដោយមិនគិតថ្លៃ។ កាលពីថ្ងៃទី២០ ខែសីហា ឆ្នាំ២០១៧ ប្រមុខរាជរដ្ឋាភិបាល ក៏បានប្រកាសឲ្យកម្មករកាត់ដេរទាំងអស់ ជិះរថយន្តក្រុងសាធារណៈនេះ ដោយឥតគិតថ្លៃ រយៈពេល ២ឆ្នាំ ចាប់ពីថ្ងៃទី២០ ខែសីហា ឆ្នាំ២០១៧ ដល់ថ្ងៃទី២០ ខែសីហា ឆ្នាំ២០១៩៕

អត្ថបទ៖ លីហៀង