«ឃ្នាបសក់»ចេញផ្សាយព្រឹកមិញនេះឯង តោះទៅអាន!

2017-09-08 03:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រឿងឃ្នាបសក់ជាស្នាដៃនិពន្ធរបស់លោកពៅសុខ ចេញផ្សាយព្រឹកនេះនៅលើប្រលោមលោកSabay ដែលរឿងនេះនិយាយពីគូស្នេហ៍មួយគូ បានជួបគ្នាព្រោះតែឃ្នាបសក់។ ចង់ដឹងសាច់រឿងទៅមុខទៀតយ៉ាងណាខ្លះ តោះទៅអានទាំងអស់គ្នា!

រាត្រីដ៏ត្រេកត្រអាល អាកាសធាតុត្រជាក់ចោលរស្មីភ្លឺព្រាលៗចូលតាមចន្លោះបង្អួចកញ្ចក់បន្ទប់គេងរបស់ខ្ញុំដែលបើកចំហ ដើម្បីឱ្យខ្យល់ចូល។ ស្បៃរាត្រី ដែលប្រគំទៅដោយសំឡេងសត្វល្អិតលាយឡំនឹងសំឡេងស្ងាត់ជ្រងំនៃធម្មជាតិ ខ្ញុំស្លៀករ៉ូបស្ដើងពណ៌ផ្កាកុលាប អង្គុយផ្អែកខ្នងទៅនឹងក្បាលគ្រែ ដែលរចនាឡើងពីឈើមានតម្លៃ និងមានក្បាច់ក្បូរតាមរបៀបខ្មែរយ៉ាងល្អប្រណីត។

ដៃខ្ញុំម្ខាងកាន់កូនកាំបិតចុងស្រួច ដៃម្ខាងកាន់ប៉ោម និងចិតសម្បកវាសើៗ រួចពុះជាបួនដាក់ទៅក្នុងចានប៉កសាឡែនលាត គ្មាន ក្បាច់ ដែលដាក់ក្បែរជើងខ្ញុំ។

ពន្លឺស្រគាំនៃអំពូលគោមចាប់ជាប់ពិដានខាងលើនៃបន្ទប់ បងវាសនា ដែលស្លៀកខោខ្លីឆ្នូតសត្រឹមភ្លៅ ពាក់អាវយឺតវាលក្លៀក បានកាន់នូវប្រអប់កាដូពណ៌ក្រហមទំហំប្រហែលមួយតឹកបួនជ្រុង មកអង្គុយជិតខ្ញុំ។ គាត់អង្គុយមើលមុខខ្ញុំដោយក្ដីស្រលាញ់។ កែវភ្នែករបស់គាត់បង្ហាញពីទឹកចិត្តនៃភក្ដីភាព និងស្មោះស្ម័គ្រចំពោះខ្ញុំ។

ខ្ញុំឈោងដៃលូកយកចំណិតប៉ោម ដែលចិតរួចមួយចំណិតហុចទៅឱ្យគាត់។ គាត់ញញឹមនៅស្ងៀមមើលមុខខ្ញុំ តែមិនព្រមទទួលទេ។ ខ្ញុំក៏យកចំណិតប៉ោមនេះ ដាក់ទៅក្នុងមាត់គាត់ ទើបគាត់ព្រមហារខាំរួចទំពាវា។ បងវាសនាមានរាងសង្ហាណាស់។ គេមានកម្ពស់មួយម៉ែត្រចិតសិប សាច់ដុំមាំ ទម្រង់មុខពិត ជាកូនខ្មែរ។ យូរបន្តិច ពេលគេទំពាប៉ោមអស់ ទើបគេហុចកាដូនោះឱ្យមកខ្ញុំ។ គេប្រាប់ខ្ញុំថា កាដូនេះមានតម្លៃគិតជាលុយគឺថោកទេ តែបើគិតអំពីអត្ថន័យនិងសារសំខាន់របស់វា វាមានតម្លៃខ្លាំងណាស់សម្រាប់គេ ជាពិសេសទាក់ទងជាមួយខ្ញុំតែម្ដង។

ខ្ញុំមិនយល់និងដឹងថា តើអត្ថន័យនិងសារប្រយោជន៍នោះវាសំខាន់ និងមានន័យសម្រាប់គេយ៉ាងណាទេ តែបន្ទាប់ពីទទួលវាពីគេមក ខ្ញុំបានបើកវាថ្នមៗនិងពិនិត្យមើលយឺតៗដើម្បីចង់ដឹងថា វាជារបស់អី? ហេតុអីក៏សំខាន់និងមានន័យចំពោះគេ។

មុនពេលបានឃើញវាខ្ញុំមានអារម្មណ៍គិតថា យ៉ាងហោចណាស់ បើវាមិនមែនជាខ្សែដៃពេជ្រ ក៏វាជាចិញ្ចៀនពេជ្រ ឬជាក្រវិលដែលដាំដោយត្បូងពេជ្រមានតម្លៃដែរ ព្រោះនេះជារាត្រីទីបីនៃរាត្រីទឹកឃ្មុំរបស់ពួកយើង ដែលបានមករស់នៅជាមួយគ្នា ក្រោយពីបានរៀបអាពាហ៍ពិពាហ៍ តាមបែបប្រពៃណីខ្មែរផង តាមបែបអឺរ៉ុបគឺគ្រឹះសាសនាផង។ តែអ្វីៗមិនដូចការគិតរបស់ខ្ញុំនេះទេ វាគ្រាន់តែជាឃ្នាបសក់ដែលច្នៃឡើងអំពីត្រឡោកដូង និងមានក្បូរក្បាច់ជារូបអង្គរវត្តតែប៉ុណ្ណោះ។

ចុចអានបន្ត