គោព្រៃកម្ពុជា ត្រូវសារព័ត៌មានបរទេសផ្ដល់កម្រិត B- នៅជម្រុះ AFC Asian Cup
- 2017-09-09 06:29:27
- ចំនួនមតិ 0 | ចំនួនចែករំលែក 0
គោព្រៃកម្ពុជា ត្រូវសារព័ត៌មានបរទេសផ្ដល់កម្រិត B- នៅជម្រុះ AFC Asian Cup
ចន្លោះមិនឃើញ
របាយការណ៍របស់សារព័ត៌មាន Fox Sports Asia បានផ្ដល់ចំណាត់ថ្នាក់កម្រិត B- ដល់ក្រុមជម្រើសជាតិកម្ពុជា គិតត្រឹមពាក់កណ្ដាលផ្លូវនៃការប្រកួតវគ្គសន្សំពិន្ទុ វគ្គជម្រុះ AFC Asian Cup 2019 បន្ទាប់ពី ៣ប្រកួតកន្លងទៅ ឈ្នះ ១ និង ចាញ់ ២។
ក្រុមដែលមានរហស្សនាមថា គោព្រៃ បានចាញ់ក្រុមហ្សកដានី ក្នុងប្រកួតទីមួយ ដោយលទ្ធផល ៧-០ ឈ្នះអាហ្វហ្គានីស្ថាន ១-០ ក្នុងប្រកួតទីពីរ និងចាញ់វៀតណាម ក្នុងលទ្ធផល ១-២ នៅក្នុងប្រកួតទីបី កាលពីពេលថ្មីៗកន្លងទៅ។ ដូច្នេះ កម្ពុជា នៅសល់ ៣ប្រកួតទៀតនៅជើងទីពីរ ក្នុងពូល C ដោយត្រូវជួបវៀតណាម នៅថ្ងៃទី១០ ខែតុលា ឆ្នាំ២០១៧, ទទួលក្រុមភ្ញៀវ ហ្សកដានី នៅថ្ងៃទី១៤ ខែវិច្ឆិកា ឆ្នាំ២០១៧ និង ប៉ះអាហ្វហ្គានីស្ថានជាថ្មី ជាការប្រកួតចុងក្រោយ នៅថ្ងៃទី២៧ ខែមីនា ឆ្នាំ២០១៨។
ប្រភពដដែល បានបញ្ជាក់ថា គោព្រៃកម្ពុជា ត្រូវការឈ្នះជាចាំបាច់នៅក្នុងផ្ទះរបស់វៀតណាម ដើម្បីបន្តក្ដីសង្ឃឹម ឡើងទៅជុំផ្តាច់ព្រ័ត្រ AFC Asian Cup 2019 ដែលនឹងរៀបចំដោយប្រទេសចិន។
Fox Sport Asia ក៏បានរម្លឹកពី ចាន់ វឌ្ឍនាកា និងប្រាក់ មុន្នីឧត្តម ជាកីឡាករដែលពោរពេញដោយទេពកោសល្យសម្រាប់ក្រុមជម្រើសជាតិកម្ពុជា។ ជាពិសេស ក្នុងនាមជាខ្សែបម្រើម្នាក់ ឧត្តម ជាអ្នកបង្កើតឲ្យមានគ្រាប់បាល់ទៅលើក្រុមអាហ្វហ្គានីស្ថាន និងជាគ្រាប់ជ័យជម្នះរបស់កម្ពុជាផងដែរ។
ក្រៅពីកម្ពុជា ដែលទទួលបានកម្រិត B- ក៏មានក្រុមហ្វីលីពីន ទទួលបាន A , សិង្ហបុរី បាន C, វៀតណាម បាន A, ម៉ាឡេស៊ី បាន C និងមីយ៉ាន់ម៉ា ទទួលបាន B+ ៕