អ្នកជំនាញ ជំរុញឲ្យប្តីប្រពន្ធមានប្រាក់ខែត្រឹម ៤០០ដុល្លារ ជួលបន្ទប់ ប្រសើរជាងទិញផ្ទះបង់រំលស់

2017-09-10 02:14:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គឹម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា និយាយថា ប្តីប្រពន្ធមានប្រាក់ខែត្រឹម ៤០០ដុល្លារ មិនអាចទិញផ្ទះបង់រំលស់បានទេ។ ជម្រើសល្អបំផុតនោះ គឺជួលបន្ទប់ស្នាក់នៅតម្លៃត្រឹម ៣០ ទៅ ៤០ដុល្លារ ក្នុង១ខែ។

លោក គឹម ហ៊ាង ពន្យល់ថា ការចំណាយក្នុងរាជធានីភ្នំពេញប្រចាំថ្ងៃ គឺច្រើនណាស់ ដូច្នេះប្រាក់ខែត្រឹម ៤០០ដុល្លារ មិនអាចទប់ទល់ឈ្នះនោះទេ។ លោកបន្តថា ការជួលបន្ទប់ស្នាក់នៅ គឺដើម្បីអាចទុកលុយជាង ២០០ដុល្លារទៀតទិញដីឡូត៍បង់រំលស់វិញ។ ប៉ុន្តែទាំងពីរនាក់ប្តីប្រពន្ធ ត្រូវគ្រប់គ្រងការចំណាយឲ្យបានល្អ គឺច្រើនបំផុតត្រឹម ១៨០ដុល្លារក្នុង១ខែ។

លោក គឹម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា

អ្នកជោគជ័យក្នុងមុខជំនួញរូបនេះ លើកឡើងថា ត្រឹមរយៈពេល ៥ឆ្នាំ ឬ១០ឆ្នាំក្រោយពីរនាក់ប្ដីប្រពន្ធ អាចមានលទ្ធភាពទិញដីនោះបាន ហើយបើចង់ធ្វើផ្ទះនៅលើដីនោះក៏បានដែរ។ ដូចនេះហើយ បើចង់យកលុយ៤០០ទៅទិញផ្ទះបង់រំលស់គឺមិនអាច ពីព្រោះប្រាក់ខែ៤០០ដុល្លារមែន ប៉ុន្តែក៏ត្រូវចំណាយទៅលើ ការស្នាក់នៅ បាយទឹក ហើយក៏គ្មានបុរីណាមួយ រំលស់ក្រោម១០០ដុល្លារនោះទេ។ លោក គឹម ហ៊ាង ប្រាប់ថា ដីឡូត៍អាចរំលស់ ៨០ ៩០ ឬ ១០០ ដុល្លារក្នុង១ខែបាន។

លោកក៏បានបញ្ជាក់បន្ថែមផងដែរថា អ្វីដែលត្រូវប្រុងប្រយ័ត្នមុនទិញដីឡូត៍ គឺត្រូវសិក្សាឱ្យច្បាស់ថា ដីឡូត៍នោះមានច្បាប់ឬក៏អត់? តាមរយៈការសាកសួរមេភូមិ សង្កាត់ ខណ្ឌ និងការិយាល័យដែនដីតាមខណ្ឌទើបអាចបញ្ចៀសហានិភ័យផ្សេងៗបាន៕