សមាជិកអាស៊ាន លុបបំបាត់ពន្ធគយ បានជិត ១០០%

2017-09-11 06:48:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាត់ពន្ធគយសរុប គិតជាមធ្យម ៩៦,០១% ត្រូវបានលុបបំបាត់រវាងប្រទេសជាសមាជិកអាស៊ាន។ ក្នុងនោះប្រទេសចំនួន ៦ គឺព្រុយណេ ឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី និងថៃ បានលុបចោលពន្ធគយ ៩៩,២%។ ចំណែកប្រទេស CLMV គឺម្ពុជា ឡាវ មីយ៉ាន់ម៉ា និងវៀតណាម បានលុបបំបាត់ពន្ធគយ ៩០,៩%។ នេះបើតាមលទ្ធផលសង្ខេបពីកិច្ចប្រជុំរដ្ឋមន្រ្តីសេដ្ឋកិច្ចអាស៊ាន លើកទី៤៩ នៅប្រទេសហ្វីលីពីន ពីថ្ងៃទី៧ ដល់ ១១កញ្ញា ២០១៧ ចេញផ្សាយដោយក្រសួងពាណិជ្ជកម្មកាលពីថ្ងៃទី១០កញ្ញា។

សូមបញ្ជាក់ថា លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានដឹកនាំប្រតិភូកម្ពុជា ដែលរួមមានតំណាងរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងការបរទេស និងសហប្រតិបត្តិការអន្តរជាតិ ចូលរួមក្នុងកិច្ចប្រជុំរដ្ឋមន្រ្តីសេដ្ឋកិច្ចអាស៊ាន ដែលធ្វើឡើងនៅទីក្រុងប៉ាសៃ។ ក្នុងនោះ ក៏មានកិច្ចប្រជុំជាមួយនឹងដៃគូពិភាក្សារបស់អាស៊ានផងដែរ រួមមាន អូស្ត្រាលី ចិន ឥណ្ឌា ជប៉ុន សាធារណរដ្ឋកូរ៉េ នូវែលហ្សេឡង់ រុស្សី និងសហរដ្ឋអាមេរិក៕