សហរដ្ឋអាមេរិក ថាខ្លួនជាអ្នកគាំទ្រដ៏ខ្លាំង ចំពោះការអភិវឌ្ឍន៍សេដ្ឋកិច្ចកម្ពុជា
- 2017-09-13 02:28:06
- ចំនួនមតិ 0 | ចំនួនចែករំលែក 0
សហរដ្ឋអាមេរិក ថាខ្លួនជាអ្នកគាំទ្រដ៏ខ្លាំង ចំពោះការអភិវឌ្ឍន៍សេដ្ឋកិច្ចកម្ពុជា
ចន្លោះមិនឃើញ
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក William Heidt បាននិយាយកាលពីថ្ងៃអង្គារម្សិលមិញនេះថា សហរដ្ឋអាមេរិកជាអ្នកគាំទ្រដ៏ខ្លាំងចំពោះការអភិវឌ្ឍន៍សេដ្ឋកិច្ចកម្ពុជា ដោយបានជួយកម្ពុជា ទាក់ទាញក្រុមហ៊ុនសម្លៀកបំពាក់ល្បីៗនៅក្នុងពិភពលោក រួមទាំងក្រុមហ៊ុនអាមេរិកផងដែរ។
និយាយក្នុងសន្និសីទសារព័ត៌មាន លោក William Heidt បានអះអាងថាក្នុងឆ្នាំកន្លងទៅ សហរដ្ឋអាមេរិកបានបង្កើតឧស្សាហកម្មថ្មីសន្លាងមួយដែលមានតម្លៃ ១០០លានដុល្លារ ស្តីពីទំនិញសម្រាប់ការធ្វើដំណើរ ដែលនៅពេលនេះប្រើកម្លាំងកម្មករចំនួនជិត ១០មុឺននាក់។
លោក Heidt បានបញ្ជាក់ទៀតថា កម្ពុជាបាននាំចេញទំនិញចូលទីផ្សារអាមេរិក តម្លៃ ៣៦ពាន់លានដុល្លារសម្រាប់រយ:ពេល ២០ឆ្នាំមកហើយ ដែលតួលេខនេះ ស្មើនឹងសេដ្ឋកិច្ចកម្ពុជាទាំងមូល ៤ដង។ លោកថ្លែងថា៖ “យើងបើកទីផ្សាររបស់យើង។ យើងបានផ្តល់ឲ្យកម្ពុជានូវការលើកលែងពន្ធនាំចូលនៅសហរដ្ឋអាមេរិក ហើយយើងបានផ្តល់ជំនួយ ដោយសារយើងចង់ឲ្យកម្ពុជាជោគជ័យ”។
លោកឯកអគ្គរដ្ឋទូត ក៏បានរៀបរាប់នូវការងារមួយចំនួនទៀតដែលសហរដ្ឋអាមេរិកបានជួយកម្ពុជា ដូចជាការដោះស្រាយអសន្តិសុខស្បៀង កាត់បន្ថយអត្រាចម្លងមេរោគអេដស៍ ស្រាវជ្រាវរកថ្នាំព្យាបាលគ្រុនចាញ់ ការអប់រំភាសាអង់គ្លេសដល់ក្មេងខ្សត់ខ្សោយ និងពង្រឹងលទ្ធិប្រជាធិបតេយ្យជាដើម។
ទាក់ទងនឹងការលើកឡើងរបស់លោក William Heidt នេះដែរ អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បាននិយាយថា កម្ពុជាមិនបានចាត់ទុកអាមេរិកជាសត្រូវនោះទេ ប៉ុន្តែគឺជាដៃគូជានិច្ច៕