សភាហ្វីលីពីន អនុម័តថវិកាចំណាយ ២០ដុល្លារ ឲ្យទៅគណៈកម្មាធិការសិទ្ធិមនុស្ស
- 2017-09-13 02:40:56
- ចំនួនមតិ 0 | ចំនួនចែករំលែក 0
សភាហ្វីលីពីន អនុម័តថវិកាចំណាយ ២០ដុល្លារ ឲ្យទៅគណៈកម្មាធិការសិទ្ធិមនុស្ស
ចន្លោះមិនឃើញ
ក្រុមតំណាងរាស្ត្រហ្វីលីពីន បានបោះឆ្នោតអនុម័តថវិកាចំណាយត្រឹមតែ ២០ដុល្លារប៉ុណ្ណោះ ឲ្យទៅគណៈកម្មាធិការសិទ្ធិមនុស្សហ្វីលីពីន នៅឆ្នាំ២០១៨។ ការបោះឆ្នោតនេះ បានធ្វើឡើងកាលពីថ្ងៃទី១២ ខែកញ្ញា ម្សិលមិញ ដោយមានសំឡេងគាំទ្រ ១១៩ លើ ១៥១សំឡេង។
ការកាត់បន្ថយការចំណាយរបស់គណៈកម្មាធិការសិទ្ធិមនុស្សហ្វីលីពីនស្ទើរទាំងស្រុងនេះ គឺក្រោយគណៈកម្មាធិការនេះ បានរិះគន់ចំពោះយុទ្ធនាការប្រយុទ្ធប្រឆាំងគ្រឿងញៀនរបស់ប្រធានាធិបតី Rodrigo Duterte និងបានស៊ើបអង្កេតលើការសម្លាប់ជនសង្ស័យគ្រឿងញៀនរាប់ពាន់នាក់ ក្នុងរយៈពេល ១៥ខែចុងក្រោយនេះ។
ចំណែកប្រធានសភាហ្វីលីពីន លោក Pantaleon Alvarez បានបញ្ជាក់ក្នុងបទសម្ភាសជាមួយទូរទស្សន៍ហ្វីលីពីនថា គណៈកម្មាធិការសិទ្ធិមនុស្សគួរតែទទួលបានការកាត់បន្ថយការចំណាយឲ្យទាប ព្រោះជាស្ថាប័នអត់ប្រយោជន៍ ដែលការពារសិទ្ធិក្រុមឧក្រិដ្ឋជន។
លោកប្រធានសភារូបនោះ បន្ថែមថា "ប្រសិនបើអ្នកការពារសិទ្ធិក្រុមឧក្រិដ្ឋជន ទៅយកថវិកាចំណាយពីក្រុមឧក្រិដ្ឋជនទៅ។ វាជារឿងធម្មតាទេ។ ហេតុអ្វីអ្នកគួរទទួលថវិកាចំណាយពីរដ្ឋាភិបាល ហើយអ្នកមិនធ្វើការរបស់អ្នក?”
សម្រាប់ថវិកាចំណាយឆ្នាំ២០១៨ គណៈកម្មាធិការសិទ្ធិមនុស្សហ្វីលីពីន បានស្នើចំនួនប្រមាណ ៣៣លានដុល្លារ ប៉ុន្ដែរដ្ឋាភិបាលបានស្នើឲ្យត្រឹមតែ ១៣លានដុល្លារប៉ុណ្ណោះ។ ចុងក្រោយសភាហ្វីលីពីនបានអនុម័តឲ្យគណៈកម្មាធិការនេះ ត្រឹមតែ ២០ដុល្លារប៉ុណ្ណោះ។
ទោះយ៉ាងណាក៏ដោយ សម្រាប់ថវិកាចំណាយរបស់គណៈកម្មាធិការសិទ្ធិមនុស្ស ដែលត្រូវបានអនុម័តហើយនេះ ត្រូវការការពិនិត្យ និងយល់ព្រមពីព្រឹទ្ធសភាហ្វីលីពីន បន្តទៀត៕