ឥទ្ធិពលព្យុះទីហ្វុង នឹងធ្វើឲ្យកម្ពុជា មានភ្លៀងធ្លាក់ច្រើន និងខ្យល់បោកបក់ខ្លាំងលើផ្ទៃសមុទ្រ

2017-09-13 05:02:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងធនធានទឹក និងឧតុនិយម បានជូនដំណឹងថា កាលពីរំលងអាធ្រាត្រយប់មិញនេះ មានកូនព្យុះមួយឈ្មោះ Doksuri បានធ្វើដំណើរឆ្លងកាត់ប្រទេសហ្វីលីពីន ចូលទៅក្នុងសមុទ្រចខាងត្បូង។ កូនព្យុះមួយនេះ នឹងបង្កើនឥទ្ធិពលទៅជាព្យុះទីហ្វុង រួចបន្តដំណើរចូលមកកាន់ឈូងសមុទ្រតុងកឹង មុនទៅដល់ភាគខាងជើងប្រទេសវៀតណាម នាយប់ថ្ងៃទី១៦ កញ្ញា។

ក្រសួងធនធានទឹក បានបញ្ជាក់ថា លក្ខណៈបែបនេះ នឹងធ្វើឲ្យអាកាសធាតុនៃព្រះរាជាណាចក្រកម្ពុជា មានស្ថានភាពដូចខាងក្រោម៖

តំបន់វាលទំនាប៖ នឹងមានភ្លៀងធ្លាក់រាយប៉ាយជាបន្តបន្ទាប់ក្នុងកម្រិតពីធម្យមទៅច្រើន ក្នុងនោះខេត្តសៀមរាប ពោធិ៍សាត់ កំពង់ឆ្នាំង និងកំពង់ធំ អាចមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១៦ ដល់ថ្ងៃទី១៩ ខែកញ្ញា។
តំបន់ខ្ពង់រាប និងតំបន់ជួរភ្នំដងរែក៖ អាចនឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១៦ ដល់ថ្ងៃទី១៩ ខែកញ្ញា។

តំបន់មាត់សមុទ្រ៖ អាចនឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១៥ ដល់ថ្ងៃទី១៨ ខែកញ្ញា។

ក្រសួងធនធានទឹក ក៏បានប្រកាសឲ្យអ្នកនេសាទសមុទ្រ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ផងដែរ ដោយសារលើផ្ទៃសមុទ្រនឹងមានខ្យល់បក់បោកខ្លាំង និងមានរលកខ្ពស់ៗ ចាប់ពីថ្ងៃទី១៥ ដល់ថ្ងៃទី១៧ ខែកញ្ញា៕