ម៉ូតូ ៤០គ្រឿង ត្រូវអគ្គិភ័យលេបត្របាក់ នៅក្រុងស្ទឹងសែន

2017-09-14 04:36:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្ទះល្វែងលក់ម៉ូតូមួយកន្លែង ស្ថិតនៅក្នុងភូមិកំពង់ក្របៅ សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ ត្រូវបានអគ្គិភ័យ លេបត្របាក់ស្ទើរទាំងស្រុង កាលពីថ្ងៃទី១៣ ខែកញ្ញា ឆ្នាំ២០១៧ វេលាម៉ោង៧និង២០នាទីយប់។ ករណីនេះបណ្ដាលឲ្យឆេះម៉ូតូចំនួន ៤០គ្រឿង និងសម្ភារមួយចំនួនទៀត ដែលគិតជាទឹកប្រាក់ខ្ទង់ម៉ឺនដុល្លារ។

លោកឧត្តមសេនីយ៍ត្រី អ៊ុក កុសល ស្នងការនគរបាលខេត្ត បានឲ្យដឹងថា ជនរងគ្រោះឈ្មោះ ទៀក យ៉ុងឈីង ភេទប្រុស អាយុ ៣១ឆ្នាំ រស់នៅកន្លែងកើតហេតុ។ លោកស្នងការបន្តថា ក្នុងហេតុការណ៍ខាងលើបណ្តាលឲ្យឆេះខូចខាតផ្ទះល្វែងជាន់ក្រោម។ បើតាមការបំភ្លឺរបស់ម្ចាស់ផ្ទះ មូលហេតុនៃអគ្គិភ័យនេះ គឺបណ្តាលមកពីឆ្លងចរន្តអគ្គិសនី។

ក្នុងកិច្ចប្រតិបត្តិការជួយសង្គ្រោះពន្លត់អគ្គិភ័យនេះ កម្លាំងជំនាញការិយាល័យបង្ការ សង្គ្រោះអគ្គិភ័យ នៃស្នងការដ្ឋាននគរបាលខេត្តកំពង់ធំ និងការចូលរួម សហការជួយដោយកងរាជអាវុធហត្ថ ប្រើប្រាស់រថយន្តពន្លត់អគ្គិភ័យ ២គ្រឿង និងប្រើប្រាស់ទឹកអស់ចំនួន ៥ឡាន រហូតមកដល់វេលាម៉ោង ១០ និង ៣០នាទីយប់ ទើបអគ្គិភ័យត្រូវបានពន្លត់ទាំងស្រុង៕

ប្រភព៖ ដើមអម្ពិល ប្រែសម្រួល៖ សំភី