ស្ថានភាពរបស់កូនក្រពើត្រី ១០ក្បាល នៅខេត្តកោះកុង ក្រោយបានញាស់ជាង ១ខែ
- 2017-09-14 06:20:02
- ចំនួនមតិ 0 | ចំនួនចែករំលែក 0
ស្ថានភាពរបស់កូនក្រពើត្រី ១០ក្បាល នៅខេត្តកោះកុង ក្រោយបានញាស់ជាង ១ខែ
ចន្លោះមិនឃើញ
អង្គការ WCS Cambodia បានឲ្យដឹងនៅថ្ងៃទី ១៤កញ្ញានេះថា កូនក្រពើត្រី (ឬក្រពើព្រៃ) ចំនួន ១០ក្បាល បន្ទាប់ពីបានញាស់រយៈពេលជាង ១ខែ ពេលនេះ គឺមានសុខភាពល្អ និងទទួលបានការថែទាំនៅក្នុងមជ្ឈមណ្ឌលអភិរក្សប្រភេទសត្វល្មូនខេត្តកោះកុង។
អ្នកថែទាំប្រចាំមជ្ឈមណ្ឌលនេះ បានឲ្យចំណីកូនក្រពើតូចៗទាំងនោះជារៀងរាល់ថ្ងៃ នូវកូនត្រី កូនកំពឹស និងកង្កែបតូច និងកំពុងតាមដានការលូតលាស់របស់ពួកវាផងដែរ។ កូនក្រពើត្រីទាំងអស់នេះ នឹងត្រូវរក្សាទុកនៅក្នុងមជ្ឈមណ្ឌល ដើម្បីចិញ្ចឹម ថែរក្សា និងលែងទៅក្នុងព្រៃវិញនៅពេលពួកវាធំ អាចរស់នៅក្នុងធម្មជាតិដោយខ្លួនឯងបាន។
ក្រពើត្រី ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុត នៅលើសាកលលោក ខណៈចំនួនរបស់ពួកវានៅតែបន្តធ្លាក់ចុះគួរឲ្យកត់សម្គាល់។ ពួកវាមានរស់នៅតែក្នុង ប្រទេសកម្ពុជា ឥណ្ឌូនេស៊ី ថៃ និងវៀតណាមតែប៉ុណ្ណោះ។ ចំនួនរបស់វា នៅលើសាកលលោកមានប្រមាណ ៤១០ក្បាល ក្នុងនោះដែរ ចន្លោះ១០០-៣០០ក្បាល កំពុងរស់នៅក្នុងព្រៃធម្មជាតិនៅក្នុងប្រទេសកម្ពុជា ដែលធ្វើឲ្យកម្ពុជាក្លាយជាប្រទេសដ៏សំខាន់បំផុតសម្រាប់ការអភិរក្សសត្វក្រពើត្រីនេះ មិនឲ្យបាត់បង់៕