CV11 កីឡាករអាស៊ានម្នាក់ ដែលបរទេសចង់ឲ្យលេងនៅឆ្ងាយឯនាយសមុទ្រ

2017-09-19 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្របពេលដែលយុវជនក្នុងតំបន់អាស៊ានឆ្នើមៗ កំពុងតែមានការអភិវឌ្ឍខ្លួនជាលំដាប់ និងកើនឡើងពីមួយថ្ងៃទៅមួយថ្ងៃ សារព័ត៌មាន FourFourTwo បានជជីករកឃើញកីឡាករ ៥រូប ដែលមានសមត្ថភាពលេងនៅឯនាយសមុទ្រ។

១- Gian Zola (ឥណ្ឌូណេស៊ី)៖

កីឡាករវ័យ១៨ឆ្នាំរូបនេះ មានជំនាញជើងឆ្វេង។ សមត្ថភាពរបស់គេ ត្រូវបានលោក Luis Miller គ្រូបង្វឹកជម្រើសជាតិឥណ្ឌូណេស៊ីមើលឃើញ ហើយលោកបានដាក់រូបគេឲ្យចូលលេងជាលើកដំបូង កាលពីខែមីនា ឆ្នាំ២០១៧។ Zola នេះហើយ ជាអ្នកស៊ុតបញ្ចូលទីមួយគ្រាប់ មកលើក្រុមជម្រើសជាតិកម្ពុជា ក្នុងការប្រកួតដែលឥណ្ឌូណេស៊ី យកឈ្នះ ២-០ នៅរាជធានីភ្នំពេញ។

២- ចាន់ វឌ្ឍនាកា (កម្ពុជា)៖

FourFourTwo បានទទួលស្គាល់នូវទេពកោសល្យរបស់កីឡាករដែលមានរហស្សនាមថា CV11 នៅពេលដែលរូបគេលេងឲ្យបឹងកេត ដែលបានចូលរួមកាលពីឆ្នាំ២០១២។ វឌ្ឍនាកា បានជួយឲ្យក្រុមគោព្រៃកម្ពុជា ឡើងទៅប្រកួតនៅក្នុងព្រឹត្តិការណ៍ AFF Suzuki Cup 2016 ដោយសារបាល់ចំនួន ២គ្រាប់របស់គេ។ បច្ចុប្បន្ន ខ្សែប្រយុទ្ធរូបនេះ គ្រាន់តែត្រូវបានខ្ចីជើងដោយក្រុមមកពីលីគទី៣ជប៉ុន Fujieda MYFC ប៉ុណ្ណោះ។

៣- Theerathon Bunmathan (ថៃ)៖

ខ្សែការពារវ័យ២៧ឆ្នាំរូបនេះ ត្រូវបានប្រភពដដែលយល់ឃើញថា សក្ដិសមនឹងលីគកំពូលជប៉ុន។ បច្ចុប្បន្ន រូបគេកំពុងលេងនៅក្រុម Muangthong United ហើយទទួលបានការចាប់អារម្មណ៍ពីក្នុងតំបន់អស់រយៈពេលជាង ៥ឆ្នាំមកហើយ។

៤- Evan Dimas (ឥណ្ឌូណេស៊ី)៖

Dimas មានវ័យ២២ឆ្នាំ លេងតួនាទីជាខ្សែបម្រើ។ រូបគេបានចូលលេងក្នុងក្រុមជម្រើសជាតិ នៅក្នុងព្រឹត្តិការណ៍ AFC U19 Championships កាលពីឆ្នាំ២០១៤។ ពេលនោះ គេរកបាន ៤គ្រាប់ ក្នុង ៣ប្រកួត។ Dimas ក៏ធ្លាប់ហ្វឹកហាត់នៅប្រទេសអេស្ប៉ាញផងដែរ ដោយលេងនៅក្រុម Llagostera និង Espanyol B ។

៥- Safawi Rasid (ម៉ាឡេស៊ី)៖

ខ្សែបម្រើស្លាបរបស់ក្រុម Johor Darul Ta'zim រូបនេះ ទើបតែជួយក្រុម U22 ម៉ាឡេស៊ី ឡើងដល់វគ្គផ្តាច់ព្រ័ត្រ នៅព្រឹត្តិការណ៍ស៊ីហ្គេម ឆ្នាំ២០១៧ ថ្មីៗកន្លងទៅ។ រូបគេជាអ្នករកគ្រាប់ដំបូង ក្នុងការប្រកួតបើកឆាករបស់ម៉ាឡេស៊ី ដែលបានយកឈ្នះព្រុយណេ ដោយលទ្ធផល ២-១ ។ គ្រាប់បាល់នោះ បង្ហាញថា Safawi មានទេពកោសល្យ ទាំងផ្នែកកម្លាំង និងបច្ចេកទេស៕

ប្រភព៖ Four Four Two ប្រែសម្រួល៖ លាភ.