ចេកណាំវ៉ា ១ស្និត នៅព្រះវិហារតម្លៃ ៩០០រៀល ប៉ុន្តែពេលដឹកមកភ្នំពេញ តម្លៃ...?
- 2017-09-15 12:55:38
- ចំនួនមតិ 0 | ចំនួនចែករំលែក 0
ចេកណាំវ៉ា ១ស្និត នៅព្រះវិហារតម្លៃ ៩០០រៀល ប៉ុន្តែពេលដឹកមកភ្នំពេញ តម្លៃ...?
ចន្លោះមិនឃើញ
លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បានឲ្យដឹងថា ចេកណាំវ៉ា ១ស្និតមានទម្ងន់ចន្លោះពី ១គីឡូក្រាម ទៅ១,២គីឡូក្រាម ដោយអាចលក់ចេញក្នុងតម្លៃ ៩០០រៀលក្នុង ១ស្និត ប៉ុន្ដែបើនាំចេញមកភ្នំពេញ តម្លៃចេកនឹងមានការកើនឡើងរហូតដល់ជិត ២ពាន់រៀលក្នុង ១ស្និត។
លោកថា ឆ្នាំនេះទិន្នផលចេកណាំវ៉ា មានការកើនឡើងខ្ពស់ ដោយសារតែមានទឹកភ្លៀងគ្រប់គ្រាន់ ហើយក្នុង១ហិកតា ប្រជាកសិករអាចប្រមូលផលបានចន្លោះពី ៥លានរៀល ទៅ៩ លានរៀល។
លោក ពឹង ទ្រីដា បញ្ជាក់ថា ខេត្តព្រះវិហារមានផ្ទៃដីដាំចេកជាង ៧ពាន់ហិកតា ភាគច្រើននៅក្នុងក្រុងព្រះវិហារ ស្រុកគូលែន និងស្រុកត្បែងមានជ័យ ហើយការដាំដុះនេះទៀតសោតធ្វើឡើងជាលក្ខណៈគ្រួសារដោយគ្មានក្រុមហ៊ុនណាមួយវិនិយោគទុននោះទេ។
ក្នុងមួយថ្ងៃខេត្តព្រះវិហារអាចនាំចេញផ្លែចេកណាំវ៉ាចំនួន ២០រថយន្ដធំ ឬប្រមាណជាង ៣០០តោន មកកាន់រាជធានីភ្នំពេញ និងបណ្ដាខេត្តជិតខាង។ ចេកណាំវ៉ា ដែលដាំដុះនៅខេត្តព្រះវិហារមានទំហំតូច ប៉ុន្តែមានរសជាតិផ្អែមឆ្ងាញ់ និងអាចកែច្នៃធ្វើជាចេកឆាប ផងដែរ។
លោក ពឹង ទ្រីដា បន្ថែមថា បច្ចុប្បន្នមានក្រុមហ៊ុនវិនិយោគចិន មួយចំនួនគ្រោងនឹងទិញទិន្នផលចេកណាំវ៉ាពីខេត្តព្រះវិហារ ដើម្បីនាំចេញទៅក្រៅប្រទេសផងដែរ បន្ទាប់ពីអាជ្ញាធរមានទំនាក់ទំនងជាមួយភាគីចិនរួចមក។ ជាមួយគ្នា អាជ្ញាធរក៍បានសហការគ្នាជាមួយប្រជាកសិករបង្កើតឲ្យមានការផលិតចេកឆាបនៅក្នុងតំបន់បន្ថែមទៀត។
សូមបញ្ជាក់ថា ខេត្តព្រះវិហារមានផ្ទៃដាំដុះដំណាំរហូតដល់ទៅជាង ៨ម៉ឺនហិកតា។ ក្រៅពីដំណាំចេក ខេត្តភាគឧត្តរប្រទេសមួ១នេះ ក៏មានដាំដំណាំជាច្រើនទៀតផងដែរ រួមមានដំឡូងមី ស្រូវ ស្វាយចន្ទីម្រេច និង ល្ពៅជាដើម៕