មុនទិញដីឡូត៍ គួរដឹងពីបញ្ហាទាំងនេះសិន

2017-09-21 07:56:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចរាចរដីឡូត៍ពុះលក់ កំពុងតែបង្កើនល្បឿនជុំវិញទីក្រុងភ្នំពេញ ខណៈច្បាប់គ្រប់គ្រងអ្នកលក់ដីឡូត៍ទាំងនោះ មិនទាន់មាននៅឡើយនៅកម្ពុជា។ ជាមួយគ្នានេះ លោក វ៉ា វីរៈ អ្នកជំនាញក្នុងវិស័យអចលនទ្រព្យ បានប្រាប់ថា បច្ចុប្បន្នដីឡូត៍ពុះលក់ កំពុងផ្ទុះឡើងស្ទើរប្រហាក់ប្រហែលគ្នានៅតំបន់ក្បែរៗរាជធានីភ្នំពេញ។ លោកថាតំបន់ដែលពុះកញ្រ្ចោលខ្លាំង ភាគច្រើននៅប៉ែកខាងជើង ខាងទំនប់កប់ស្រូវ ភ្នំពេញថ្មី និងតំបន់ប៉ែកខាងត្បូង ដូចជានៅខាងខណ្ឌដង្កោ ផ្លូវវែងស្រេងជាដើម។

លោក វីរៈ បានរៀបរាប់ថា ជារឿយៗ អ្នកដែលទិញដីឡូត៍ មិនសូវបានស្វែងយល់ស៊ីជម្រៅ ថាតើតំបន់ដីនោះនឹងមានការអភិវឌ្ឍន៍ក្នុងពេលបច្ចុប្បន្ន និងអនាគតកម្រិតណានោះទេ។ មួយវិញទៀតនោះ ពាក់ព័ន្ធផ្លូវច្បាប់ អ្នកទិញក៏មិនទាន់ច្បាស់ថាខ្លួនមានសិទ្ធិកម្រិតណា ក្នុងការធ្វើជាម្ចាស់កម្មសិទ្ធិផងដែរ។

ទន្ទឹមគ្នានេះ អ្នកនាញបនេះបានផ្ដល់ដំបូន្មានថា៖ " មុននឹងសម្រេចចិត្តថាទិញដីនៅតំបន់ណាមួយ គួរសាកសួរ និងសិក្សាបន្ថែមថាតំបន់(ហ្នឹង)នឹងគម្រោងអ្វីអភិវឌ្ឍនាពេលខាងមុខដែរឬទេ មានហេដ្ឋារចនាសម្ព័ន្ធគ្រប់គ្រាន់ហើយឬនៅ?”។ លោកបន្តថា គម្រោងអភិវឌ្ឍន៍ អាចជាគម្រោងពីរដ្ឋាភិបាល ពីវិស័យឯកជន ដែលមកសាងសង់ ឬបង្កើតផ្សារទំនើប កន្លែងកម្សាន្ត អគារពាណិជ្ជកម្ម ឬគម្រោងផ្សេងៗ។

ដោយឡែក កត្តាហេដ្ឋារចនាសម្ព័ន្ធ លោកថាអ្នកទិញត្រូវតែពិនិត្យមើលថាមានប្រព័ន្ធទឹកភ្លើង ប្រព័ន្ធលូ កន្លែងចាក់សំរាមដែរទេ។ លោកបញ្ជាក់ថា បើគ្មានហេដ្ឋារចនាសម្ព័ន្ធគ្រប់គ្រាន់ទេ អ្នកទិញអាចជួយបបញ្ហាស្ទះលូ និងសម្រាមនៅ ៣ ទៅ ៥ឆ្នាំក្រោយ ជាមិនខាន។

ក្រៅពីនេះ អ្នកជំនាញខាងលើ ក៏បានណែនាំដល់អ្នកទិញដីឡូត៍ដោយបង់រំលស់ ឬមិនបង់រំលស់ក៏ដោយ ត្រូវតែសុំសិទ្ធិកាន់កាប់ក្បាលដីផ្ទាល់ខ្លួន។ មានន័យថា អ្នកទិញត្រូវសុំឲ្យអ្នកលក់ធ្វើប្លង់បំបែកកម្មសិទ្ធិ បញ្ជាក់ពីអាជ្ញាធរក្នុងតំបន់នោះឲ្យបានដឹងឮ ដើម្បីការពារហានិភ័យ។ លោកគូសបញ្ជាក់ថា៖ "អ្នកលក់ខ្លះមិនល្អ អាចយកប្លង់ដីទាំងនោះទៅបញ្ជាំនៅធនាគារ យកប្រាក់ទៅធ្វើអ្វីផ្សេងបន្ថែម ហើយប្រសិនបើបញ្ហាកើត ដីទាំងនោះនឹងត្រូវធនាគាររឹបអូស... តែយើងមិនដឹងនោះ យើងប្រាកដជាស៊យជាមិនខាន"៕

អត្ថបទ៖ ស៊ិន សាវ៉េត