លោក ហ៊ុន ម៉ាណែត ទៅបំពេញទស្សនកិច្ចផ្លូវការនៅក្រសួងការពារជាតិបារាំង

2017-09-22 01:49:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហ៊ុន ម៉ាណែត បានដឹកនាំគណៈប្រតិភូមួយក្រុមទៅបំពេញទស្សនកិច្ចផ្លូវការនៅក្រសួងការពារជាតិបារាំង កាលពីយប់ថ្ងៃទី២១ ខែកញ្ញា ឆ្នាំ២០១៧ ម្សិលមិញ។ ការអញ្ជើញទៅបំពេញទស្សនកិច្ចនេះ គឺក្នុងគោលបំណងនៃការរឹតចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេសទាំងពីរ កម្ពុជា-បារាំង និងតបតាមការអញ្ជើញរបស់ក្រសួងការពារជាតិបារាំង។

នៅក្នុងអំឡុងពេលនៃដំណើរទស្សនកិច្ចនេះ លោក ហ៊ុន ម៉ាណែត គ្រោងនឹងជួបពិភាក្សាការងារជាមួយលោកឧត្តមសេនីយ៍ Philippe ERRERA អគ្គនាយកនៃអគ្គនាយកដ្ឋានទំនាក់ទំនងអន្តរជាតិ និងយុទ្ធសាស្ត្រ នៃក្រសួងការពារជាតិបារាំង នៅក្នុងទីក្រុងប៉ារីស និងជួបជាមួយ លោកឧត្តមសេនីយ៍ Patrick COLLET នាយសេនាធិការប្រចាំតំបន់ Occitanie នៅក្នុងទីក្រុង Toulouse។

លើសពីនេះទៀត លោក ហ៊ុន ម៉ាណែត និងគណៈប្រតិភូ ក៏ត្រូវបានអនុញ្ញាតឲ្យចូលជួបពិភាក្សាការងារជាមួយលោក M.Michel HERBILLON តំណាងរាស្ត្រ និងជាប្រធានសមាគមមិត្តភាព បារាំង-កម្ពុជា នៅវិមានរដ្ឋសភាបារាំង (Palais Bourbon) ផងដែរ។

ក្រៅពីដំណើរទស្សនកិច្ចផ្លូវការលើកនេះ លោក ហ៊ុន ម៉ាណែត ក៏មានគម្រោងជួបជាមួយយុវជន និងនិស្សិតខ្មែរ បងប្អូនពាណិជ្ជករខ្មែរ-ចិន និងបងប្អូនប្រជាពលរដ្ឋខ្មែរជាច្រើននាក់ នៅតាមបណ្ដាប្រទេសមួយចំនួន នៅក្នុងទ្វីបអឺរ៉ុបថែមទៀតផងដែរ៕