ការលើកឡើងរបស់ Leo លើបញ្ហារបស់ CV11 អាចជាយុទ្ធសាស្ត្រមុនជួបវៀតណាម?
- 2017-10-07 03:22:23
- ចំនួនមតិ 0 | ចំនួនចែករំលែក 0
ការលើកឡើងរបស់ Leo លើបញ្ហារបស់ CV11 អាចជាយុទ្ធសាស្ត្រមុនជួបវៀតណាម?
ចន្លោះមិនឃើញ
ក្រោយបញ្ចប់ការប្រកួតមិត្តភាពអន្តរជាតិជាមួយក្រុមជម្រើសជាតិឥណ្ឌូណេស៊ី កាលពីពេលថ្មីៗកន្លងទៅ លោក Leonardo Vitorino គ្រូបង្វឹកក្រុមជម្រើសជាតិកម្ពុជា បានលើកឡើងពីបញ្ហារបស់ខ្សែប្រយុទ្ធ ចាន់ វឌ្ឍនាកា ដែលលោកបានប្ដូរចេញនៅពាក់កណ្ដាលតង់ទីពីរ ហើយនេះគឺក៏អាចជាយុទ្ធសាស្ត្ររបស់លោក ដើម្បីបង្វែងគូប្រកួត ដូចកាលមុនស៊ីហ្គេមលើកទី២៩ នៅប្រទេសម៉ាឡេស៊ី ផងដែរ។
អតីតគ្រូបង្វឹកក្រុម Lanexang United របស់ឡាវរូបនេះ បានថ្លែងក្នុងសន្និសីទសារព័ត៌មានក្រោយកម្ពុជា ចាញ់ឥណ្ឌូណេស៊ី ៣-១ ថា ការប្ដូរកីឡាករសំខាន់ដែលតែងតែរកគ្រាប់បាល់ឲ្យជម្រើសជាតិកម្ពុជា ព្រោះរូបគេកំពុងមានបញ្ហាសាច់ដុំ។ បន្ថែមពីនេះ លោកបន្តថា កីឡាករដែលកំពុងរួមរស់ជាមួយក្លឹប Fujieda MYFC ដដែល ហាក់មានចលនាបម្លាស់ទីយឺតជាងមុន។ ការបញ្ជាក់របស់លោកនេះ ធ្វើឡើងមុនការប្រកួតវគ្គជម្រុះ ពានរង្វាន់ AFC Asian Cup 2019 ទល់នឹងក្រុមជម្រើសជាតិវៀតណាម។
ដូចគ្នានេះដែរ កាលពីមុនជំនួបជាមួយក្រុម U22 ហ្វីលីពីន នៅព្រឹត្តិការណ៍ស៊ីហ្គេម ប្រទេសម៉ាឡេស៊ី នាខែសីហាកន្លងទៅ លោក Leo ដែលបានដឹកនាំក្រុម U22 កម្ពុជា ក៏ធ្លាប់និយាយដែរថា ខ្សែបម្រើ ច្រឹង ពលរដ្ឋ បានជួបនឹងបញ្ហារបួស ហើយអាចត្រូវអវត្តមាន ១-២ ប្រកួតនៅស៊ីហ្គេម។ ប៉ុន្តែជាក់ស្ដែង លោកបានដាក់កីឡាកររូបនេះឲ្យចូលលេងបានដោយធម្មតា។
កម្ពុជា នឹងទៅសួរសុខទុក្ខវៀតណាម ក្នុងការប្រកួតទីបួន វគ្គជម្រុះ AFC Asian Cup 2019 នៅថ្ងៃទី១០ ខែតុលា ខាងមុខនេះ វេលាម៉ោង ៧ យប់។ ទោះជាយ៉ាងណា មិនទាន់មានការបញ្ជាក់ពីស្ថានភាពរបស់កីឡាករដែលមានរហស្សនាមថា CV11 នៅឡើយទេ ដូច្នេះគេត្រូវចាំមើលជាក់ស្ដែងនៅថ្ងៃដែលការប្រកួតចូលមកដល់៕