ការយកពន្ធលើវិស័យភាពយន្តខ្មែរ ជាក្តីកង្វល់របស់ផលិតករជាច្រើននាក់

2017-10-09 07:48:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចុងសប្តាហ៍កន្លងទៅនេះ ផលិតករជាច្រើននាក់បានជួបជុំពិភាក្សាគ្នានៅសាកលវិទ្យាល័យភ្នំពេញអន្តរជាតិ ក្នុងគោលបំណងបង្ហាញក្ដីកង្វល់របស់ខ្លួនជុំវិញការយកពន្ធទៅលើបុគ្គលិកទាំងអស់ដែលជាប់កាតព្វកិច្ចបម្រើវិស័យភាពយន្ត។

ថ្លែងក្នុងកិច្ចពិភាក្សាខាងលើលោក ឆាយ បូរ៉ា ចាងហ្វាងផលិតកម្មដើមត្នោតបានលើកឡើងថា តាមការពន្យល់ពីមន្ត្រីពន្ធដារនាពេលថ្មីៗនេះ រាល់បុគ្គលិកដែលបម្រើក្នុងវិស័យភាពយន្តដែលទទួលបានប្រាក់បៀវត្សទាំងអស់ ត្រូវមានកាតព្វកិច្ចបង់ពន្ធជូនទៅរដ្ឋ មិនថាអ្នកនិពន្ធ ក្រុមអ្នកកាត់តវីដេអូ ឬតារាសម្ដែងភាពយន្តឡើយ។

លោក ឆាយ បូរ៉ា ចាងហ្វាងផលិតកម្មដើមត្នោត

លោកថា៖ «***ទោះបីជាយើងជួលសិល្បករ ឲ្យពួកគាត់មកសម្ដែង ១ ភាគ ឬ ១ឆាក ក៏ខាងពន្ធដារតម្រូវឲ្យយើងកាត់ពន្ធពីសិល្បករហ្នឹងទុកដែរ អ៊ីចឹងហើយទើបយើងហៅសមាគមសិល្បករឲ្យគាត់មកចូលរួមឲ្យដឹងពីបញ្ហាហ្នឹង ក្នុងគោលបំណងជួយផ្សព្វផ្សាយ និងពន្យល់សិល្បករភាពយន្តទាំងអស់ បើគាត់មិនយល់ពីបញ្ហាហ្នឹងទេ គាត់អត់បង់ពន្ធទេ***»។

បន្ថែមពីនេះលោក និងផលិតករផ្សេងទៀតសូមស្នើសុំដល់ក្រសួងវប្បធម៌ និងវិចិត្រសិល្បៈ ក៏ដូចជាប្រមុខរាជរដ្ឋាភិបាលឲ្យជួយអនុគ្រោះទៅលើការបង់ពន្ធលើវិស័យភាពយន្តខ្មែរ ដោយបន្ថយមកនៅត្រឹម ៥ ទៅ ១០ ឆ្នាំ ចាំបង់ពន្ធម្ដង ឬមិនបាច់បង់ពន្ធតែម្ដង ពីព្រោះវិស័យភាពយន្ត គឺជាផ្នែកមួយជួយទ្រទ្រង់វិស័យវប្បធម៌ឲ្យកាន់តែរីកសុះសាយ និងទូលំទូលាយ។

ដោយឡែក លោក កុយ ស៊ីឌឿន ជាក្រុមប្រឹក្សាភិបាល សមាគមសិល្បករខ្មែរ បានសុំអំពាវនាវដល់ប្រមុខរដ្ឋាភិបាលឲ្យជួយបន្ធូរបន្ថយទៅលើការយកពន្ធពីផលិតករ និងអ្នកដែលជាប់ពាក់ព័ន្ធបម្រើឲ្យវិស័យភាពយន្ត ព្រោះអាជីពជាផលិតករ និងអ្នកសម្ដែងមិនទៀងឡើយ ជួនកាល១ឆ្នាំថតបាន ១រឿងក៏មាន ចំណែកខ្លះទៀតអត់មានសោះក៏បានដែរ។

លោក កុយ ស៊ីឌឿន ជាក្រុមប្រឹក្សាភិបាល សមាគមសិល្បករខ្មែរ (ឆ្វេង)

លោកបានមានប្រសាសន៍ថា៖ «ខ្ញុំចង់ឲ្យរដ្ឋកំណត់ពន្ធ លើផលិតកម្មទាំងអស់ហ្នឹងពីខ្នាតមធ្យមមកត្រឹមខ្នាតតូចបានហើយ ពីព្រោះខ្នាតមធ្យមយើងត្រូវតែរាយការណ៍របាយការណ៍ពន្ធហ្នឹងរៀងរាល់ខែ អំពីប្រាក់ចំណូល និងចំណាយ ហើយផលិតកម្មភាគច្រើនគាត់អត់មានបុគ្គលិកទេ គាត់អត់មានអាជីវកម្មអ្វីដែលធ្វើរៀងរាល់ខែដែរ គាត់មិនអាចប្រកាសពន្ធរៀងរាល់ខែបានទេ»។

ហេតុផលដែលលោកស្នើសុំឲ្យរដ្ឋកំណត់ពន្ធ ចំពោះផលិតកម្មទាំងអស់ពីខ្នាតមធ្យមមកខ្នាតតូចដោយសារតែអាជីវកម្មខ្នាតតូចមួយឆ្នាំប្រកាសពន្ធម្ដង។ ទាក់ទងគម្រោងក្នុងការដាក់លិខិតស្នើសុំទៅក្រសួងវប្បធម៌ ក៏ដូចជាប្រមុខរាជរដ្ឋាភិបាល លោក និងផលិតករមួយចំនួនទៀត នឹងដាក់ក្នុងពេលឆាប់ៗ ដើម្បីឲ្យពួកគេបង្ហាញពីក្ដីកង្វល់របស់ខ្លួនចំពោះការយកពន្ធ៕