អូស្រ្ដាលី ព្រួយបារម្ភចំពោះការស្នើឲ្យមានការរំលាយគណបក្សសង្រ្គោះជាតិ

2017-10-12 04:07:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថានទូតអូស្រ្ដាលី ប្រចាំកម្ពុជា បានចេញសេចក្ដីថ្លែងការណ៍ ចុះថ្ងៃទី១១ ខែតុលាម្សិលមិញនេះ ដោយបង្ហាញការព្រួយបារម្ភជុំវិញការវិវត្តនយោបាយកម្ពុជា នាពេលថ្មីៗនេះ។

ស្ថានទូតអូស្រ្ដាលី បានបញ្ជាក់ក្នុងសេចក្ដីថ្លែងការណ៍នោះថា៖ "សកម្មភាពថ្មីបំផុតពាក់ព័ន្ធនឹងការស្នើសុំឲ្យមានការរំលាយគណបក្សសង្រ្គោះជាតិ បានបង្កឲ្យមានការព្រួយបារម្ភជាបន្តទៀត។ ការឈានទៅរកការលុបចោលគណបក្សប្រឆាំងធំចម្បង នឹងក្លាយជាជំហានថយក្រោយមួយនៅក្នុងដំណើរលទ្ធិប្រជាធិបតេយ្យ ព្រមទាំងជះឥទ្ធិពលដល់ការទទួលបានការបោះឆ្នោតជាតិដែលសេរី និងយុត្តិធម៌ និងមានតម្លាភាព នាខែកក្កដា ឆ្នាំ២០១៨ ខាងមុខ"។

ក្រុមតំណាងរាស្រ្ដគណបក្សសង្រ្គោះជាតិ

នៅក្នុងសេចក្ដីថ្លែងការណ៍ដដែល ស្ថានទូតអូស្រ្ដាលី បន្ថែមថា៖ "ការប្តេជ្ញាចិត្តដ៏រឹងមាំរបស់ប្រជាពលរដ្ឋកម្ពុជាចំពោះលទ្ធិប្រជាធិបតេយ្យពហុបក្ស បានបង្ហាញយ៉ាងច្បាស់តាមរយៈចំនួនប្រជាពលរដ្ឋដែលបានទៅបោះឆ្នោត និងលទ្ធផលនៃការបោះឆ្នោតឃុំ-សង្កាត់ នាខែមិថុនា ឆ្នាំ២០១៧ កន្លងទៅ"។

ស្ថានទូតអូស្រ្ដាលី ក៏បានបញ្ជាក់ផងដែរថា អូស្រ្ដាលីនឹងបន្តលើកទឹកចិត្តដល់កម្ពុជាក្នុងការផ្តល់នូវបរិយាកាសអំណោយផល និងប្រកបដោយសុវត្ថិភាពជូនប្រជាជនកម្ពុជា ដើម្បីអនុវត្តនូវសិទ្ធិសេរីភាពក្នុងការបញ្ចេញមតិ និងការប្រមូលផ្តុំ។ វិស័យសារព័ត៌មានដែលរស់រវើក សង្គមស៊ីវិលដែលសកម្ម និងគណបក្សប្រឆាំងដែលអាចជឿជាក់បាន ជាសមាសធាតុនៃសង្គមប្រជាធិបតេយ្យ។

នេះជាការសម្ដែងការព្រួយបារម្ភថ្មីមួយទៀតទាក់ទងនឹងស្ថានការណ៍នយោបាយនៅកម្ពុជា។ កាលពីថ្ងៃទី៩ ខែតុលាកន្លងទៅ សភាអឺរ៉ុប ក៏បានបង្ហាញការព្រួយបារម្ភដូចគ្នានេះ៕

អត្ថបទ៖ សោភា