លោកផៃ ស៊ីផាន ប្រតិកម្មនឹងការព្រួយបារម្ភរបស់អូស្រ្ដាលី ជុំវិញស្ថានភាពនយោបាយកម្ពុជា
- 2017-10-12 13:26:47
- ចំនួនមតិ 0 | ចំនួនចែករំលែក 0
លោកផៃ ស៊ីផាន ប្រតិកម្មនឹងការព្រួយបារម្ភរបស់អូស្រ្ដាលី ជុំវិញស្ថានភាពនយោបាយកម្ពុជា
ចន្លោះមិនឃើញ
លោកផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានប្រតិកម្មឆ្លើយតបទៅនឹងការព្រួយបារម្ភរបស់ស្ថានទូតអូស្ត្រាលី ជុំវិញស្ថានការណ៍នយោបាយកម្ពុជា ដែលថាការលុបចោលគណបក្សប្រឆាំង នឹងក្លាយជាជំហានថយក្រោយមួយនៅក្នុងដំណើរលទ្ធិប្រជាធិបតេយ្យ។
អ្នកពាក្យរាជរដ្ឋាភិបាលកម្ពុជា បានបញ្ជាក់នៅល្ងាចថ្ងៃទី១២ ខែតុលានេះថា "ការព្រួយបារម្ភនេះ មិនអាចទុកថាជាការត្រឹមត្រូវទេ ហើយអូស្ត្រាលីជាដៃគូអភិវឌ្ឍន៍ ក៏ដូចជាដៃគូនៅក្នុងការពិភាក្សា ច្បាស់ជាយល់ពីបំណងរបស់ប្រជាពលរដ្ឋកម្ពុជាដែលត្រូវការកសាងលទ្ធិប្រជាធិបតេយ្យ ឈរទៅលើសន្តិភាព សន្តិសុខជាតិ និងវិបុលភាព។ ដូច្នេះបំណងរបស់កម្ពុជា គឺចង់បានដូចជាប្រជាជាតិដទៃ និងមិនចង់បានគណបក្សណាមួយដែលជាអាយ៉ងរបស់បរទេស"។
លោកបន្ថែមទៀតថា៖ "យើងលុបបំបាត់គណបក្សសង្គ្រោះជាតិ ដោយសារគណបក្សនេះអត់មានវប្បធម៌ ឬក៏មាននិន្នាការប្រជាធិបតេយ្យនោះទេ គឺគេមាននិន្នាការឧទ្ទាមច្រើនជាងអ្នកធ្វើនយោបាយ"។
គួររំលឹកផងដែរថា ស្ថានទូតអូស្រ្ដាលី ប្រចាំកម្ពុជា កាលពីថ្ងៃទី១១ តុលាម្សិលមិញនេះ បានចេញសេចក្ដីថ្លែងការណ៍ ដោយបង្ហាញការព្រួយបារម្ភជុំវិញស្ថានភាពនយោបាយកម្ពុជា ដោយបានបញ្ជាក់ថា៖ "សកម្មភាពថ្មីបំផុតពាក់ព័ន្ធនឹងការស្នើសុំឲ្យមានការរំលាយគណបក្សសង្រ្គោះជាតិ បានបង្កឲ្យមានការព្រួយបារម្ភជាបន្តទៀត។ ការឈានទៅរកការលុបចោលគណបក្សប្រឆាំងធំចម្បង នឹងក្លាយជាជំហានថយក្រោយមួយនៅក្នុងដំណើរលទ្ធិប្រជាធិបតេយ្យ...”៕
ចុចអានអត្ថបទទាក់ទង៖ អូស្រ្ដាលី ព្រួយបារម្ភចំពោះការស្នើឲ្យមានការរំលាយគណបក្សសង្រ្គោះជាតិ