រាជរដ្ឋាភិបាល នឹងរៀបចំពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ

2017-10-12 13:52:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំបុណ្យជាតិ និងអន្តរជាតិ បានប្រកាសថា នៅព្រឹកថ្ងៃអាទិត្យ ទី១៥ ខែតុលា ឆ្នាំ២០១៧ រាជរដ្ឋាភិបាល នឹងរៀបចំពិធីគោរពព្រះវិញ្ញាណក្ខន្ធព្រះបរមរតនកោដ្ឋ ព្រះករុណា អតីតព្រះមហាក្សត្រ សម្តេចព្រះ នរោត្តម សីហនុ គម្រប់ ៥ឆ្នាំ។

គណ:កម្មាធិការរៀបចំបុណ្យជាតិ និងអន្តរជាតិ បានណែនាំឲ្យគ្រប់ក្រសួងស្ថាប័ន និងរាជធានីភ្នំពេញ ត្រូវចាត់តាំងគណ:ប្រតិភូថ្វាយកម្រងផ្កាព្រះវិញ្ញាណក្ខន្ធ ព្រះករុណាព្រះបរមរតនកោដ្ឋ នៅមណ្ឌលសួនច្បារ នៅខាងកើតវិមានឯករាជ្យ នៅព្រះបរមរូបរបស់ព្រះអង្គ នាថ្ងៃទី១៥ ខែតុលា វេលាម៉ោង ៧ព្រឹកតទៅ។

ប្រជាពលរដ្ឋ នាំគ្នាទៅគោរពព្រះវិញ្ញាណក្ខន្ធ ព្រះករុណាព្រះបរមរតនកោដ្ឋ កាលពីឆ្នាំ២០១២

ជាមួយគ្នានោះ ស្ថាប័ន រាជធានី និងគ្រប់ខេត្ត ត្រូវដាក់តាំងព្រះបរមឆាយល័ក្ខណ៍ ព្រះករុណាព្រះបរមរតនកោដ្ឋ ដោយប្រើព្រះបរមឆាយល័ក្ខថ្មី មិនស្លក់ពណ៌ បំភ្លឺភ្លើង និងតុបតែងលម្អទង់ជាតិ ទង់ក្អែប បដាពាក្យស្លោក ឲ្យបានសមរម្យ។

ក្នុងនោះដែរ គណ:កម្មាធិការរៀបចំបុណ្យជាតិ និងអន្តរជាតិ ក៏បានណែនាំឲ្យក្រសួងព័ត៌មាន រៀបចំ ផ្សព្វផ្សាយឲ្យបានទូលំទូលាយតាមវិទ្យុ ទូរទស្សន៍ជាតិ និងឯកជន អំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្ថរបស់ព្រះករុណាព្រះបរមរតនកោដ្ឋជាទីគោរពសការ:ដ៏ខ្ពង់ខ្ពស់បំផុតចំពោះជាតិ សាសនា និងប្រជារាស្ត្រ។

សូមបញ្ជាក់ថា ព្រះករុណាព្រះបាទសម្តេចព្រះ នរោត្តម សីហនុ បានយាងចូលទិវង្គត នៅថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា ដោយទទួលបរមបច្ឆាមរណនាម “ព្រះបរមរតនកោដ្ឋ”៕

អត្ថបទ៖ លីហៀង