ការប្រគំតន្រ្ដីរបស់ Ed Sheeran នៅថៃ អាចនឹងលប់ចោល ទោះសំបុត្រលក់ដាច់អស់គ្មានសល់

2017-10-17 00:27:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការប្រគំតន្រ្ដីរបស់ Ed Sheeran នៅប្រទេសថៃ នាខែវិច្ឆិកាក្រោយនេះ អាចនឹងត្រូវលុបចោល ដោយសារតែតារាចម្រៀងអង់គ្លេសរូបនេះ បានរងរបួសបាក់ដៃ ក្នុងហេតុការណ៍គ្រោះថ្នាក់ចរាចរណ៍រវាងកង់ និងរថយន្ត។

ម្ចាស់បទ "Shape of You" បាននិយាយប្រាប់អ្នកគាំទ្រលើបណ្ដាញសង្គម Instagram ថា៖ "ខ្ញុំមានគ្រោះថ្នាក់បន្តិចបន្តួចពេលជិះកង់ ហើយបច្ចុប្បន្នខ្ញុំកំពុងរង់ចាំការផ្ដល់ប្រឹក្សាពីគ្រូពេទ្យ ដែលអាចប៉ះពាល់ខ្លះដល់កម្មវិធីនាពេលខាងមុខ។

Ed Sheeran បង្ហោះរូបរបួសដៃលើ Instagram

មកទល់ពេលនេះ ក្រុមហ៊ុនរៀបចំការប្រគំតន្រ្ដី Thai Ticket Major នៅតែបន្តផ្សព្វផ្សាយពីការប្រគំតន្រ្ដីនេះដដែល ទោះបីសំបុត្រលក់ដាច់អស់គ្មានសល់ ត្រឹមតែប៉ូន្មាននាទីក្រោយដាក់លក់កាលពីថ្ងៃទី១ ខែកក្កដា។ តម្លៃសំបុត្រ គឺចន្លោះពី ១៨០០បាត ដល់ ៥៥០០បាត (ជាង ៥៤ដុល្លារ ដល់ជាង ១៦៦ដុល្លារ)។

ការប្រគំតន្រ្ដីដ៏ធំនេះ នឹងធ្វើឡើងចាប់ពីម៉ោង ៨កន្លះយប់ថ្ងៃទី១៦ ខែវិច្ឆិកា នៅ Impact Arena ក្នុងតំបន់មឿងថង ថានី។ មកទល់ពេលនេះ នៅមិនទាន់មានការបញ្ជាក់ជាផ្លូវការ ថាតើការប្រគំតន្រ្ដីនេះ នឹងត្រូវលប់ចោល ឬលើកពេលនៅឡើយទេ៕