CNRP មិនគាំទ្រការអនុម័តសេចក្ដីស្នើច្បាប់ពាក់ព័ន្ធការបែងចែកអាសនៈ
- 2017-10-17 09:19:21
- ចំនួនមតិ 0 | ចំនួនចែករំលែក 0
CNRP មិនគាំទ្រការអនុម័តសេចក្ដីស្នើច្បាប់ពាក់ព័ន្ធការបែងចែកអាសនៈ
ចន្លោះមិនឃើញ
គណបក្សសង្រ្គោះជាតិ នៅថ្ងៃទី១៧ ខែតុលានេះ បានចេញសេចក្ដីថ្លែងការណ៍មិនគាំទ្រ ចំពោះការអនុម័តរបស់រដ្ឋសភា ចំពោះសេចក្ដីស្នើច្បាប់ចំនួន ៤។
នៅក្នុងសេចក្ដីថ្លែងការណ៍នោះ គណបក្សសង្រ្គោះជាតិ បានលើកហេតុផលថា ការអនុម័តសេចក្ដីស្នើច្បាប់ទាំង ៤ គឺជាការរំលោភលើឆន្ទៈពលរដ្ឋ រំលោភរដ្ឋធម្មនុញ្ញ និងជាការឆ្ពោះទៅរកការធ្វើឲ្យបាត់បង់ភាពស្របច្បាប់នៃស្ថាប័នជាតិសំខាន់ៗ។
គណបក្សសង្រ្គោះជាតិ បានអំពាវនាវឲ្យស្ថាប័នជាតិដែលមានសមត្ថកិច្ចក្នុងការអនុម័តច្បាប់ ឲ្យពិនិត្យ និងពិចារណាឡើងវិញ ដើម្បីគោរពឆន្ទៈរបស់ប្រជាពលរដ្ឋខ្មែរ។ គណបក្សនេះក៏បានអំពាវនាវឲ្យស្ថាប័នអន្តរជាតិ ពិចារណាឲ្យបានដិតដល់មុនធ្វើកិច្ចសហប្រតិបត្តិការជាមួយស្ថាប័នដែលខ្លួនចាត់ទុកថាមិនស្របច្បាប់ផងដែរ។
គួររម្លឹកផងដែរថា រដ្ឋសភាបានអនុម័តទាំងស្រុងលើសេចក្តីស្នើច្បាប់ស្តីពីវិសោធនកម្មច្បាប់ចំនួន ៤ ពាក់ព័ន្ធនឹងការបែងចែកអាសនៈ កាលពីព្រឹកថ្ងៃទី១៦ ខែតុលា។ សេចក្ដីស្នើច្បាប់ទាំង ៤ មានដូចជា វិសោធនកម្មច្បាប់ស្ដីពីការបោះឆ្នោតជ្រើសតាំងតំណាងរាស្រ្ដ ច្បាប់ស្ដីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងច្បាប់ស្ដីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ៕