កីឡាករសំខាន់របស់មីយ៉ាន់ម៉ា ពេលប៉ះកម្ពុជា មាននរណាខ្លះ?
- 2017-11-07 07:57:33
- ចំនួនមតិ 0 | ចំនួនចែករំលែក 0
កីឡាករសំខាន់របស់មីយ៉ាន់ម៉ា ពេលប៉ះកម្ពុជា មាននរណាខ្លះ?
ចន្លោះមិនឃើញ
គ្រូបង្វឹកក្រុមជម្រើសជាតិមីយ៉ាន់ម៉ា លោក Gerd Zeise បានកោះហៅកីឡាករចំនួន ២៣នាក់ ដើម្បីត្រៀមប្រកួតមិត្តភាពអន្តរជាតិទល់នឹងក្រុមជម្រើសជាតិកម្ពុជា នាថ្ងៃទី៩ ខែវិច្ឆិកា ឆ្នាំ២០១៧ នៅពហុកីឡដ្ឋានជាតិ។ ក្នុងនោះ គេសង្កេតឃើញកីឡាករសំខាន់ ៣រូប ដែលកម្ពុជា គួរមានការប្រុងប្រយ័ត្ន។
កីឡាកររូបនេះ មានអ្នកគាំទ្រកម្ពុជាជាច្រើនប្រហែលជាធ្លាប់បានស្គាល់ពីទេពកោសល្យរបស់គេ។ Aung Thu មានវ័យ ២១ឆ្នាំ កម្ពស់ ១,៦៨ម៉ែត្រ កើតនៅទីក្រុង Pyinmana ប្រទេសមីយ៉ាន់ម៉ា។ ចាប់ពីឆ្នាំ 2011 មក រូបគេធ្លាប់បង្ហាញខ្លួន នៅក្រុម U16, U20 និង U23 មីយ៉ាន់ម៉ា។ Aung Thu ធ្លាប់លេងឲ្យ U16 ចំនួន ៤លើក ស៊ុតបញ្ចូលទីបាន ៤គ្រាប់, នៅ U19 បង្ហាញខ្លួនបាន ១៩លើក ស៊ុតបាន ១២គ្រាប់, នៅ U23 បង្ហាញខ្លួន ១០លើក ស៊ុតបាន ៥គ្រាប់។ ចំណែក ការបង្ហាញខ្លួននៅជម្រើសជាតិឈុតធំ មាន ២៣លើក រកបាន ៧គ្រាប់។
២- ខ្សែប្រយុទ្ធ Kyaw Ko Ko របស់ក្លឹប Yangon United
រូបគេមានវ័យ ២៤ឆ្នាំ កម្ពស់ ១,៧៣ម៉ែត្រ កើតនៅទីក្រុង Amarapura ប្រទេសមីយ៉ាន់ម៉ា។ ថ្នាលយុវជនរបស់ក្លឹប Zeyar Shwe Myay ដដែល ចាប់ផ្ដើមលេងនៅក្រុមជម្រើសជាតិ U23 កាលពីឆ្នាំ២០០៩ ដោយបង្ហាញខ្លួនបានចំនួន ១៥លើក រកបាន ៨គ្រាប់។ ចំណែកនៅក្រុមជម្រើសជាតិឈុតធំ រូបគេរកបាន ១១គ្រាប់ ក្នុងចំណោម ៤៤ប្រកួត។
៣- ខ្សែបម្រើ Yan Aung Kyaw របស់ក្លឹប Yangon United
Aung Kyaw មានវ័យ ២៨ឆ្នាំ កម្ពស់ ១,៧០ម៉ែត្រ កើតនៅទីក្រុង Yangon ប្រទេសមីយ៉ាន់ម៉ា។ ខ្សែបម្រើរូបនេះ ក៏ចាប់ផ្ដើមលេងឲ្យជម្រើសជាតិ U23 ផងដែរ ដោយបង្ហាញខ្លួន ៤លើក។ ទោះជាមិនធ្លាប់រកគ្រាប់បាល់ឲ្យក្រុមជម្រើសជាតិ Aung Kyaw ត្រូវចាត់ទុកជាកម្លាំងស្នូលដ៏សំខាន់របស់ក្រុមជម្រើសជាតិមីយ៉ាន់ម៉ា សម្រាប់ការប្រកួតមិត្តភាពទល់នឹងកម្ពុជា។
សូមបញ្ជាក់ថា ក្រុមជម្រើសជាតិមីយ៉ាន់ម៉ា នឹងធ្វើដំណើរមកដល់រាជធានីភ្នំពេញ នៅល្ងាចថ្ងៃអង្គារ ទី៧ ខែវិច្ឆិកា ឆ្នាំ២០១៧ នេះ៕