គួច សុគុម្ភៈ នឹងធ្វើជាប្រធានក្រុមជម្រើសជាតិ ក្នុងការប្រកួតថ្ងៃស្អែក

2017-11-08 06:55:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករ គួច សុគុម្ភៈ ដែលទើបតែត្រូវបានកោះហៅចូលក្រុមជម្រើសជាតិសាជាថ្មី នឹងត្រូវដើរតួជាប្រធានក្រុមជម្រើសជាតិកម្ពុជា ក្នុងជំនួបមិត្តភាពអន្តរជាតិទល់នឹងក្រុមមីយ៉ាន់ម៉ា។ នេះជាការបញ្ជាក់របស់លោកគ្រូបង្វឹក ប្រាក់ សុវណ្ណារ៉ា។

សកម្មភាពរបស់កីឡាករ គួច សុគុម្ភៈ ប្រកួតមិត្តភាពជាមួយ African All Stars កាលពីថ្ងៃទី៥វិច្ឆិកា

អតីតគ្រូបង្វឹកក្លឹបបឹងកេតរូបនេះ បានបញ្ជាក់ថា គួច សុគុម្ភៈ មានសមត្ថភាព និងបទពិសោធន៍គ្រប់គ្រាន់ក្នុងការធ្វើជាប្រធានក្រុម។ លើសពីនេះ លោកបន្តថា រូបគេធ្លាប់ទទួលបានការបណ្ដុះបណ្ដាលជាគ្រួបង្វឹកច្រើន ដែលជាហេតុធ្វើឲ្យរូបគេអាចជួយណែនាំដល់មិត្តរួមក្រុមដទៃទៀតជំនួសគាត់ នៅក្នុងទីលានអំឡុងពេលប្រកួត ព្រោះលោកនៅក្រៅទីលាន មានការពិបាកក្នុងការស្រែកបញ្ជា មិនដូចប្រធានក្រុមឡើយ។

គួររំឭកថា គួច សុគុម្ភៈ បាននឹងក្លាយជាប្រធានក្រុមជម្រើសជាតិកម្ពុជា បន្ទាប់ពីខ្សែប្រយុទ្ធ ឃួន ឡាបូរ៉ាវី ដែលត្រូវបានផ្ដល់តួនាទីនេះដោយអតីតគ្រូបង្វឹកសញ្ជាតិប្រេស៊ីល លោក Leonardo Vitorino។

បន្ទាប់ពីជួបក្រុមមីយ៉ាន់ម៉ា នៅថ្ងៃទី៩វិច្ឆិកា វេលាម៉ោង ៦:៣០ នាទីល្ងាច ក្រុមជម្រើសជាតិកម្ពុជានឹងបន្តស្វាគមន៍ក្រុមហ្សកដានី ក្នុងការប្រកួតវគ្គជម្រុះ AFC Asian Cup នាថ្ងៃទី១៤ វិច្ឆិកា ឆ្នាំ២០១៧៕

អត្ថបទ៖ លាភ.