កម្ពុជា ចុះកិច្ចព្រមព្រៀងជាមួយចិន លើគម្រោងជំរុញផលិតកម្មស្រូវ និងការនាំចេញអង្ករ
- 2017-11-13 09:27:29
- ចំនួនមតិ 0 | ចំនួនចែករំលែក 0
កម្ពុជា ចុះកិច្ចព្រមព្រៀងជាមួយចិន លើគម្រោងជំរុញផលិតកម្មស្រូវ និងការនាំចេញអង្ករ
ចន្លោះមិនឃើញ
ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើអនុស្សរណៈយោគយល់គ្នាចំនួន២ ស្តីពីគម្រោងជំរុញផលិតកម្មស្រូវ និងការនាំចេញអង្ករជាមួយភាគីចិន កាលពីព្រឹកថ្ងៃទី១៣ ខែវិច្ឆិកា ឆ្នាំ២០១៧ ក្រោមអធិបតីភាពលោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ។
MoUទី១ គឺរវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម ជាមួយភាគីចិន តំណាងដោយធនាគារនីហរ័ណ-អាហរ័ណចិន (the Export-Import Bank of China) និងក្រុមហ៊ុនស៊ីទីកហ្គ្រុប (CITIC Group Corporation)។
MoUទី២ គឺរវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម ជាមួយភាគីចិន តំណាងដោយក្រុមហ៊ុន CITIC Construction Co., Ltd. និងក្រុមហ៊ុន Henan Yuguang International Economic & Technical Cooperation ដោយមានគោលបំណងកំណត់មូលដ្ឋានសម្រាប់រៀបចំ និងអនុវត្តគម្រោង រួមមានការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង ។
គោលបំណងនៃការចុះ MoU នេះគឺដើម្បីកំណត់ចំណុចសំខាន់ៗពាក់ព័ន្ធនឹងទស្សនាទាន វិសាលភាព រចនាសម្ព័ន្ធអនុវត្ត ប្រភព និងគំរូហិរញ្ញប្បទាន ព្រមទាំងកិច្ចការហិរញ្ញវត្ថុនៃគម្រោង។ កិច្ចព្រមព្រៀងនេះ នឹងផ្ដល់ជាមូលដ្ឋានច្បាស់លាស់ សម្រាប់ការរៀបចំ និងការអនុវត្ត គម្រោងដូចជា៖ ការសិក្សាសមិទ្ធិលទ្ធភាព ការរៀបចំប្លង់លម្អិត ផែនការហិរញ្ញប្បទាន ការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង យន្តការប្រើប្រាស់ស្រូវ-អង្ករស្តុកក្នុងឃ្លាំងជាវត្ថុបញ្ចាំ ដើម្បីទទួលបានឥណទានពីធនាគារ និងការបង្កើតទីផ្សារលក់ដូរស្រូវ-អង្ករ ។ ផ្សារភ្ជាប់ជាមួយគម្រោងនេះ ភាគី ចិននឹងខិតខំប្រឹងប្រែងជួយជ្រោមជ្រែងក្នុងការបង្កើនការនាំចេញអង្ករកម្ពុជាទៅចិន បន្ថែមពីលើកូតាដែលមានស្រាប់។
គម្រោងជំរុញផលិតកម្មស្រូវ និងការនាំចេញអង្ករនេះ ត្រូវបានរៀបចំឡើងដើម្បីបង្កើតប្រព័ន្ធ ឃ្លាំងសាធារណៈសម្រាប់ស្តុកស្រូវ-អង្ករ ដែលផ្អែកតាមការសិក្សាបឋម គម្រោងនឹងសាងសង់ប្រព័ន្ធឃ្លាំងស្តុក និងឡសម្ងួតស្រូវ-អង្ករ ចំនួន ១៥ឃ្លាំង មានសមត្ថភាពសម្ងួតស្រូវសើមដល់ទៅ ១៩ ៥០០តោនក្នុងមួយថ្ងៃ និងមានសមត្ថភាពស្តុកស្រូវ-អង្ករស្ងួតបានដល់ទៅ ១លានតោន ស្ថិតក្នុងខេត្តចំនួន១១ ដែលមានសក្តានុពលក្នុងការផលិតស្រូវ-អង្ករ ។ គម្រោងនេះ មិនត្រឹមតែមានការសាងសង់ហេដ្ឋារចនាសម្ព័ន្ធទេ តែរួមទាំងមានប្រតិបត្តិការ និងការថែទាំល្អ និងប្រព័ន្ធគ្រប់គ្រងវត្ថុបញ្ចាំ ដើម្បីសម្របសម្រួលការផ្ដល់ឥណទាន ដោយប្រើប្រាស់ស្តុកស្រូវ-អង្ករជាវត្ថុបញ្ចាំផងដែរ៕