អ៊ីណូ ច្រៀងក្នុងកម្មវិធី១ បានលុយឱបពេញដៃ
- 2017-11-15 06:17:59
- ចំនួនមតិ 0 | ចំនួនចែករំលែក 0
អ៊ីណូ ច្រៀងក្នុងកម្មវិធី១ បានលុយឱបពេញដៃ
ចន្លោះមិនឃើញ
លោក អីណូ តារាចម្រៀងផលិតកម្មសាន់ដេ បានធ្វើឲ្យទស្សនិកជនចាប់អារម្មណ៍ជាថ្មី ក្រោយលោកបានបង្ហាញរូបភាពអង្គុយឱបលុយរៀលរាប់លាន។ លោកបានឆ្លើយប្រាប់ថា នោះជាតម្លៃពលកម្មរបស់លោកផ្ទាល់តែម្ដង។
ប្រាក់រៀលដែលតារាចម្រៀង អ៊ីណូ ទទួលបាននោះ គឺមានចំនួនប្រមាណជាង៥លានរៀល ស្មើនឹង ១៣០០ដុល្លារសហរដ្ឋអាមេរិក ដែលលោកទើបតែទទួលបានពីការងារចេញច្រៀង ក្នុងកម្មវិធីពិព័រណ៍មួយនៅលើទឹកដីខេត្តតាកែវថ្មីៗ តាមការចាត់ចែងរបស់ថ្នាក់លើលោកផ្ទាល់។
បើទោះជាការទទួលប្រាក់ដុល្លារ មានភាពងាយស្រួល មិនសំពីងសំពោងច្រើន ប៉ុន្តែម្ចាស់បទ “ប្រុសក្រញាញ់ខូចចិត្ត” រូបនេះ អះអាងថា លោកក៏រីករាយទទួលយកថ្លៃពលកម្មជារូបិយប័ណ្ណក្នុងស្រុកដូចគ្នា។
អ៊ីណូ បានចូលប្រឡូកក្នុងពិភពសិល្បៈតាំងពីឆ្នាំ ២០០៨មក បន្ទាប់ពីប្រឡងជាប់ចំណាត់ថ្នាក់លេខ២ផ្នែកចម្រៀង ក្នុងកម្មវិធីរបស់ស្ថានីយទូរទស្សន៍បាយ័ន។ ក្រោយពីតស៊ូច្រៀងនៅតាមក្លឹបកម្សាន្តនានា ក្រោយមកលោកក៏បានក្លាយជាតារាចម្រៀង ផលិតកម្មសាន់ដេអំឡុងឆ្នាំ ២០១៣។
បន្ទាប់ពីបានសាងកេរ្តិ៍ល្បីៗល្បាញក្នុងផលិតកម្មខាងលើ មកទល់បច្ចុប្បន្នលោកបានទទួលតម្លៃខ្លួន ពី ១៣០០ ទៅ ១៥០០ដុល្លារ សម្រាប់ការចេញច្រៀងមួយកម្មវិធី ។ តម្លៃនេះ គឺអាស្រ័យទៅលើការចរចា និងទីតាំង ដែលលោកត្រូវចេញធ្វើការ។
ជាតារាចម្រៀង និងជាអ្នកនិពន្ធផង អ៊ីណូ អះអាងថា ពីពេលនេះទៅមុខ លោកនៅតែរីករាយទទួលតម្លៃពលកម្មទាំងលុយរៀល និងលុយដុល្លារ ពិសេសលុយរៀលតែម្ដង។ ធ្វើបែបនេះ លោកថា ព្រោះតែលោកចង់បង្ហាញការគាំទ្រមួយផ្នែកដល់រូបិយប័ណ្ណក្នុងស្រុកផង ក្នុងនាមលោកជាមនុស្សរបស់មហាជន៕
សូមទស្សនាវីដេអូរបស់ ៣០ដេលី៖