ជប៉ុនផ្តល់ជំនួយជាង៧លានដុល្លារ សម្រាប់ដោះនិងកម្ទេចមីន នៅខេត្តបាត់ដំបង

2017-11-16 00:33:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងសមាហរណកម្មការបោសសំអាតមីន និងការជួយសង្គ្រោះជនពិការដោយសារមីន ដែលមានទឹកប្រាក់ចំនួន ៣ ៥៣៦ ៧០០ ដុល្លារអាមេរិក សម្រាប់គាំទ្រកម្លាំងប្រតិបតិ្តការចំនួនជិត ៥០០ នាក់ ក្នុងរយៈពេល ១២ ខែ គិតចាប់ពីខែមករា ដល់ខែធ្នូ ឆ្នាំ២០១៨ នឹងធ្វើឡើង នៅបណ្តាស្រុកគោលដៅ នៅខេត្តបាត់ដំបង។

ពិធីចុះហត្ថលេខា លើគម្រោងដោះមីននេះ ត្រូវបានធ្វើឡើងដោយលោក ហេង រតនា អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា CMAC នឹងអង្គការជប៉ុន JICS ដែលទទួលអនុវត្តគម្រោងនេះ កាលពីរសៀលថ្ងៃពុធ ទី១៥ ខែវិចិ្ឆកា ឆ្នាំ២០១៧ នៅទីបញ្ជាការស៊ីម៉ាក់ ក្នុងរាជធានីភ្នំពេញ។

សូមបញ្ជាក់ថា នេះជាការអនុវត្តគម្រោងឆ្នាំទី២ នៃគម្រោងជំនួយ ៣ឆ្នាំរបស់ជប៉ុន ចាប់ពីឆ្នាំ២០១៧-២០១៩។ លោក ហេង រតនា អគ្គនាយក CMAC បានលើកឡើងថា ទន្ទឹមនឹងចុះហត្ថលេខាលើការអនុវត្តគម្រោងដោះមីននៅខេត្តបាត់ដំបង លោកក៏បានចុះហត្ថលេខាលើកិច្ចសន្យាទិញសម្ភារៈបន្ថែម រួមមាន គ្រឿងចក្រកម្ទេចមីន ចំនួន ៥គ្រឿង និងតង់ស្នាក់នៅរបស់អ្នកដោះមីនចំនួន ៤៦ តង់ ដែលមានថវិកាសរុបចំនួនជាង ៣ ៧៤២ ៥៩២ ដុល្លារ។

គ្រឿងចក្រកម្ទេចមីនធុនធ្ងន់ និងតង់ស្នាក់នៅទាំងនេះ នឹងមកដល់កម្ពុជា នៅខែមីនា ឆ្នាំ២០១៨ ខាងមុខនេះ។ ដូចនេះ គម្រោងទាំង ២នេះ មានថវិកាសរុបចំនួនជាង ៧លាន ៣សែនដុល្លារអាមេរិក សម្រាប់កិច្ចប្រតិបតិ្តការ ក្នុងឆ្នាំ២០១៨ ខាងមុខនេះ៕

អត្ថបទ៖ លីហៀង