រាប់សិបនាក់របួស និងគ្មានទីជម្រកជាង ១ពាន់នាក់ ដោយគ្រោះរញ្ជួយដីនៅកូរ៉េខាងត្បូង

2017-11-16 07:18:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មនុស្ស៥៦នាក់បានរងរបួស និង១៥៣៦នាក់ ត្រូវបានបង្ខំឲ្យចាកចេញពីផ្ទះសម្បែងពួកគេ ដោយសារគ្រោះរញ្ជួយដីរង្វាស់ ៥,៤រ៉ិចទ័រ បានវាយប្រហារក្រុង Pohang ប្រទេសកូរ៉េខាងត្បូង កាលពីថ្ងៃទី១៥វិច្ឆិកាម្សិលមិញ។ នេះបើតាមក្រសួងមហាផ្ទៃ និងសុវត្ថិភាពកូរ៉េខាងត្បូង បានឲ្យដឹងនៅថ្ងៃទី១៦វិច្ឆិកានេះ។

ផ្ទះច្រើនជាង ១ពាន់ខ្នង អគារ និងរថយន្តរាប់សិបផ្សេងទៀត ត្រូវបានបំផ្លាញទាំងស្រុង។ ក្នុងនោះរញ្ជួយដីនេះ ក៏បានធ្វើឲ្យបែកប្រេះហេដ្ឋារចនាសម្ព័ន្ធផ្សេងទៀតដូចជា មូលដ្ឋានយោធា ស្ពាន កំពង់ផែ និងកន្លែងផ្គត់ផ្គង់ទឹកជាដើម។ ចំណែកក្រសួងអប់រំ ក៏បានពន្យាពេលនៃការប្រឡងចូលសកលវិទ្យាល័យរបស់សិស្ស ដោយសារតែអគារប្រឡងមានការប្រេះស្រាំ និងការផ្លាស់ទីលំនៅរបស់សិស្ស។

រដ្ឋាភិបាលកូរ៉េខាងត្បូង នឹងចំណាយជាង ៣,៦លានដុល្លារសម្រាប់ស្តារតំបន់រងគ្រោះនេះឡើងវិញ។

គួរបញ្ជាក់ថា នេះគឺជាគ្រោះរញ្ជួយដីដ៏ខ្លាំងបំផុតទី២ ដែលបានវាយប្រហារកូរ៉េខាងត្បូង ចាប់តាំងពីប្រទេសនេះ បានចាប់ផ្តើមតាមដានត្រួតពិនិត្យរញ្ជួយដីនេះនៅឆ្នាំ១៩៧៨។ រញ្ជួយដីដ៏ធំបំផុតនោះ គឺមានរង្វាស់ ៥,៨រ៉ិចទ័រ កើតឡើងកាលពីខែកញ្ញា ឆ្នាំ២០១៦ នៅជិតក្រុង Gyeongju ដែលស្ថិតនៅកៀកក្រុង Pohang នេះផងដែរ៕

ប្រភព៖ Japantimes ប្រែសម្រួល៖ សំភី