រូបគំនូរស្ត្រីទី១អាមេរិក នឹងដាក់ដេញថ្លៃយកថវិកាឲ្យពេទ្យគន្ធបុប្ផា

2017-11-16 08:51:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រូបគំនូរស្ត្រីទី១ អាមេរិក លោកស្រី Jacqueline Kennedy ភរិយារបស់ប្រធានាធិបតីទី៣៥ សហរដ្ឋអាមេរិក លោក John F. Kennedy រួមនឹងរូបថត Portrait ប្រាសាទបាយ័ន សម្លៀកបំពាក់ និងការស្នាក់នៅវិឡាលំដាប់ផ្កាយ៥ នឹងត្រូវដាក់ឲ្យដេញថ្លៃ ដើម្បីយកប្រាក់ឲ្យពេទ្យគន្ធបុប្ផា នៅល្ងាចថ្ងៃទី៣០ ខែវិច្ឆិកា ឆ្នាំ២០១៧ នៅសណ្ឋាគារ Raffles Hotel Le Royal រាជធានីភ្នំពេញនេះ។

លក្ខណៈពិសេស នៃរបស់ដែលត្រូវដាក់ដេញថ្លៃទាំង៤នោះគឺ៖

១. រូបគំនូរ Lithography ស្ត្រីទី១អាមេរិក លោកស្រី Jacqueline Kennedy គឺជារូបគំនូរដែលគូរដោយសិល្បករល្បីឈ្មោះនៅលើពិភពលោក ជនជាតិបែលហ្ស៊ិក លោក Christian Develter។ ស្នាដៃរបស់សិល្បកររូបនេះ ធ្លាប់ត្រូវបានយកទៅដាក់តាំងបង្ហាញនៅជុំវិញពិភពលោកផងដែរ។

រូបគំនូរស្រ្ដីទី១អាមេរិក Jacqueline Kennedy គូរដោយសិល្បករ Christian Develter

២. រូបថត Portrait ប្រាសាទបាយ័ន១សន្លឹក គឺជារូបថតដែលថតដោយអ្នកថតរូបល្បីជនជាតិអាមេរិកលោក John McDermott។ រូបថតជាច្រើនរបស់អ្នកថតរូបល្បីរូបនេះក៏មានដាក់តាំងក្នុង Art Gallery John McDermott ដែលមានទីតាំងនៅតាមបណ្ដោយផ្លូវខាងលិចស្ទឹងសៀមរាប។

រូបថត Portrait ប្រាសាទបាយ័ន ថតដោយ John MCDermott

៣. សម្លៀកបំពាក់រចនាដោយអ្នកច្នៃម៉ូដល្បីជនជាតិបារាំងលោក Eric Raisina។ សំលៀកបំពាក់របស់អ្នកច្នៃម៉ូដរូបនេះធ្លាប់បានចូលរួមក្នុងកម្មវិធី Fashion Show ធំៗនៅលើពិភពលោក ហើយមានទីតាំងលក់៤កន្លែង មាននៅទីក្រុងប៉ារីស ១កន្លែង នៅខេត្តសៀមរាប ២កន្លែង និងនៅរាជធានីភ្នំពេញ ១កន្លែង។

៤. ការស្នាក់២យប់នៅវិឡាលំដាប់ផ្កាយ៥ នៅសណ្ឋាគារ Raffles Grand Hotel d'Angkor ខេត្តសៀមរាប។ វិឡាលំដាប់ផ្កាយ៥ ក៏ជាវិឡាសម្រាប់ស្នាក់នៅរបស់លោកស្រី Michelle Obama កាលមកទស្សនៈកិច្ចនៅខេត្តសៀមរាប ឆ្នាំ២០១៥ កន្លងទៅផងដែរ។

វីឡាលំដាប់ផ្កាយ ៥ Raffles Grand Hotel d'Angkor

បើតាមប្រធានផ្នែកទំនាក់ទំនងទីផ្សាររបស់សណ្ឋាគារ Raffles Hotel Le Royal កញ្ញា សំអុល ស៊ីឡាក់ បានប្រាប់ថា តម្លៃក្នុងការដាក់ឲ្យដេញថ្លៃ រូបគំនូរ រូបថត សម្លៀកបំពាក និងសំបុត្រស្នាក់នៅវិឡាលំដាប់ផ្កាយ៥ គឺមានតម្លៃចាប់ផ្ដើមពីតម្លៃ៩៥០ដុល្លារឡើងទៅ ហើយថវិកាដែលទទួលបានពីការដេញថ្លៃនេះនឹងផ្ដល់ឲ្យពេទ្យគន្ធបុប្ផាទាំងស្រុង៕

រូបថត៖ ផ្ដល់ឲ្យ

អត្ថបទ៖ លន ហ្សាឌីណា