អាជ្ញាធររាជធានីភ្នំពេញ នឹងប្រារព្ធខួប ៧ឆ្នាំ នៃឧបទ្ទវហេតុលើស្ពានកោះពេជ្រ

2017-11-16 10:19:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធររាជធានីភ្នំពេញ បានប្រកាសថា នឹងរៀបចំពិធីបង្សុកូលរំលឹកដល់ដួងវិញ្ញាណក្ខន្ធជនរងគ្រោះ នៅក្នុងឧបទ្ទវហេតុ រត់ជាន់គ្នាលើស្ពានពេជ្រ នៃទីក្រុងកោះពេជ្រ កាលពីថ្ងៃទី២២ ខែវិច្ឆិកា ឆ្នាំ២០១០។ ពិធីជួបជុំតាមបែបព្រះពុទ្ធសាសនា នឹងប្រព្រឹត្តទៅនៅវេលាម៉ោង ៧ព្រឹក ថ្ងៃទី២២ ខែវិច្ឆិកា ឆ្នាំ២០១៧ ដោយមានរាប់បាត្រ និងប្រគេនទេយ្យវត្ថុដល់ព្រះសង្ឃ ចំនួន ១០៨អង្គ នៅស្តូបក្បែរស្ពាននាគ នៃទីក្រុងកោះពេជ្រ ដើម្បីឧទ្ទិសកុសលផលបុណ្យជូនជនរងគ្រោះ ដែលបានបាត់បង់អាយុជីវិតក្នុងហេតុការណ៍ខាងលើ។

ស្តូបរំលឹកវិញ្ញាណក្ខន្ធ អ្នកបាត់បង់ជីវិតនៅលើស្ពានពេជ្រ (រូបថត៖ RFA)

សូមរំលឹកថា នៅយប់បង្ហើយនៃព្រះរាជពិធីបុណ្យអុំទូក កាលពីយប់ថ្ងៃទី២២ ខែវិច្ឆិកា ឆ្នាំ២០១០ មានព្រឹត្តិការណ៍ផ្អើលរត់ជាន់គ្នា នៅលើស្ពានកោះពេជ្រ ក្នុងរាជធានីភ្នំពេញ បណ្តាលឲ្យមនុស្ស ៣៥៣នាក់ស្លាប់ និង ៣៩៣នាក់រងរបួស។

បន្ទាប់ពីសោកនាដកម្មនោះ សម្តេច ហ៊ុន សែន បានប្រកាសឲ្យមានការកាន់មរណទុក្ខរបស់ជាតិទាំងមូល ហើយផ្តល់ជំនួយជាទឹកប្រាក់ជូនគ្រួសារនៃសព ដែលក្នុងនោះ អ្នកស្លាប់ម្នាក់ ទទួលបាន១ម៉ឺនដុល្លារ។

កាលពីថ្ងៃទី១១ ខែសីហា ឆ្នាំ២០១១ សាលារាជធានីភ្នំពេញ បានចាប់ផ្តើមសាងសង់ស្តូបទុករំលឹកវិញ្ញាណក្ខន្ធដល់អ្នកស្លាប់ទាំងនោះ។ ស្តូបរំលឹកវិញ្ញាណក្ខន្ធអ្នកស្លាប់នៅស្ពានកោះពេជ្រ ត្រូវបានសាងសង់ឡើង នៅគល់ស្ពានកោះពេជ្រ ដែលក្រោយមកបន្តិច ស្ពាននោះ ត្រូវបានវាយកម្ទេចចោល៕

អត្ថបទ៖ លីហៀង